Իրանի նախագահը հայտարարել է, որ երկիրը պետք է նվազեցնի նավթի վաճառքից առաջացող եկամուտներից կախվածությունը

Իրանի նախագահ Մասուդ Փեզեշքիանը հայտարարել է, որ կառավարությունը պատրաստ է համագործակցել արտադրողների և ձեռնարկատերերի հետ՝ կոչ անելով նրանց բացահայտել այն ոլորտները, որտեղ կառավարության աջակցությունն ամենաշատն է անհրաժեշտ, հաղորդում է իրանական Mehr գործակալությունը։

Փեզեշքիանն ընդգծել է Իրանի նավթի վաճառքից առաջացող եկամուտներից կախվածությունը նվազեցնելու և տեղական տաղանդների ու արդյունաբերության ամբողջ ներուժը բացահայտելու անհրաժեշտությունը։

Հինգշաբթի առավոտյան Արդաբիլի նահանգ կատարած մեկօրյա այցի ժամանակ Փեզեշքիանը դիմել է տեղի ներդրողներին և տնտեսական շահագրգիռ կողմերին։

«Եթե հավատանք ինքներս մեզ և գիտակցենք մեր հնարավորությունները,- ասել է նա,- կարող ենք շատ բանի հասնել այս երկրում։ Մեր տնտեսությունն ու զարգացումը չպետք է կախված լինեն միայն նավթի վաճառքից»,- ընդգծել է Իրանի նախագահը՝ մեջբերելով այլ երկրների հաջողությունները, որոնք հարուստ չեն բնական պաշարներով։

«Կան երկրներ, որոնք չունեն նավթ կամ գազ և ստիպված են ներմուծել դրանք, բայց նրանք ուժեղ են։ Ինչո՞ւ պետք է մենք առանց նավթի լինենք, երբ մենք ունենք այդքան շատ նորարարներ և արդյունաբերական ուղեղներ»,- շեշտել է նա։

Փեզեշքիանը նշել է, որ կառավարությունը պատրաստ է համագործակցել արտադրողների և ձեռնարկատերերի հետ՝ նրանց կոչ անելով բացահայտել այն ոլորտները, որտեղ կառավարության աջակցությունն ամենաշատն է անհրաժեշտ։

«Մեր պարտականությունն է հարթել ճանապարհը, որպեսզի կարողանաք առաջ շարժվել ուժով և վստահությամբ,- ասել է նա։ -Սակայն սպասումները պետք է մնան մեր հնարավորությունների սահմաններում»։