Կարեն Վարդանյանի անհետացման գործով կատարվում է հետաքննություն

«Այս պահին դեռ ոչ մի հստակ տեղեկատվություն չունենք»: Newspress.am-ի հետ զույցում ասաց «Իրազեկ քաղաքացիների միավորում» հասարակական կազմակերպությունում որպես գլխավոր փորձագետ աշխատող Կարեն Վարդանյանի ընկերը՝ Ֆիլիպ Արզումանյանը:

Նրա խոսքով այս պահին դեռ ուսումնասիրություններ են կատարվում:

«Ուսումնասիրվում են փաստերը, թե կոնկրետ ով և երբ է վերջին անգամ տեսել նրան ու ինչ է խոսել նրա հետ: Աշխատում ենք օպտիմալ՝ ի մի բերելով տվյալները, որպեսզի կարողանանք հասկանալ»,-ասաց Ֆիլիպ Արզումանյանը:

Նա առայժմ չցանկացավ որևէ նոր տվյալ հայտնել այն մասին, թե որ փուլում են հիմա և ինչ են արձանագրել մինչ այս պահը՝ հորդորելով մի քիչ էլ սպասել:

Ոստիկանության լրատվական բաժնի աշխատակից Արմեն Մալխասյանը Newspress.am-ի հետ զրույցում տեղեկացրեց, որ երեկ՝ մարտի 28-ին, Կարեն Վարդանյանի անհետացման մասին ոստիկանության Մալաթիայի բաժին հաղորդումներ են ներկայացվել նրա հարազատների և «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի կողմից:

«Հավաքվել են համապատասխան նյութեր, կատարվում է հետաքննություն»,- ասաց Մալխասյանը:

Նշենք, որ վերջին տվյալներով՝ Կարեն Վարդանյանը մարտի 17-ին դուրս է եկել տանից՝ Դուբայ մեկնելու համար և նրանից այլևս ոչ մի տեղեկություն չկա: