Ադրբեջանի ՊՆ-ում սկանդալ է հասունացել

Ադրբեջանական բանակում խոշոր սկանդալ է հասունացել։ Տեղեկացնում է ընդդիմադիր azadliq.az կայքը։

Ադրբեջանի Պաշտպանության նախարարության զենքի և տեխնիկայի բաժնի ղեկավար Յագուբ Էվեդովը նախարար Զեքիր Հասանովի հրամանով ազատվել է աշխատանքից։ Նրան զրկել են զինվորական կոչումից և նրա նկատմամբ դատական գործ են հարուցել։

Ադրբեջանական կայքի պնդմամբ՝ դա կապված է մարտի սկզբին Ռուսաստանի վարչապետի տեղակալ Դմիտրի Ռոգոզինի Բաքու կատարած այցի հետ։ Այդ ժամանակ նշվեց, որ Ռոգոզինը այցելել է Բաքու չվճարվող զենքի պարտքերի վերաբերյալ քննարկումների։ Սակայն ադրբեջանական պաշտոնյաները՝ ՊՆ Զեքիր Հասանովը և ԱԳՆ Էլդար Մամեդյարովը մերժեցին այն տեղեկությունը, թե իբր Ռոգոզինը պարտքի համար է ժամանել Բաքու, այլ զենքի պարամատրերի հետ կապված փոքրիկ հարցեր կան։ Սակայն այժմ կայքը տեղեկություններ ունի, որ հենց այդ զենքի առքուվաճառքի հետ կապված խնդրի պատճառով աշխատանքից հեռացվել և դատարանի առաջ է կանգնել Ադրբեջանի ՊՆ բարձրաստիճան պաշտոնյան։

Նշվում է, որ մոտ 3․5 մլն դոլարի խնդիր է առաջացել։ Ադրբեջանը պատվիրել է ռազմական տեխնիկա, սակայն մատակարարված տեխնիկայի պարամետրերն ավելի ցածր են եղել։ Ուսումնասիրության արդյունքում պարզվել է, որ հենց զենքի և տեխնիկայի բաժնի պետն է փոխել պարամետրերը ու պատվիրել ավելի էժան զենք, ինչի հետևանքով 3․5 մլն դոլար է լվացվել։