ՍԴ-ն չի շտապում պարզել «ՀԷՑ»-ը խլելու վերաբերյալ իշխանությունների ընդունած օրենքի սահմանադրականության հարցը

ՍԴ-ն չի շտապում պարզել  «ՀԷՑ»-ը խլելու վերաբերյալ իշխանությունների ընդունած օրենքի սահմանադրականության հարցը։ Արդեն 1,5  ամիս է, ինչ  ՍԴ-ն ձգձգում է ԱԺ ընդդիմադիր երկու խմբակցությունների կողմից ներկայացված դիմումը վարույթ ընդունելու հարցը, ասել է թե՝ կառույցը չգիտի՝ ինչպես վարվել դիմումի հետ, ստիպված ձգձգում է՝ խախտելով օրենքով նախատեսված ժամկետները։ «Փաստնֆո»-ի փոխանցմամբ, դիմումատու Արծվիկ Մինասյանը կասկածներ ունի՝ ՍԴ դատավորների կողմից Սահմանադրական արդարադատություն իրականացնելու լիազորություններից հրաժարվելու վերաբերյալ։՝
  
«Տաշիր» գրուպի սեփականատեր, բարերար Սամվել Կարապետյանի՝ ի պաշտպանություն Հայ առաքելական սուրբ եկեղեցու արված հայտարարություններին հաջորդել են իշխանությունների կողմից ՀԷՑ-ը խլելու օպերացիան՝ զուգորդված նաև գործադիրի ղեկավարի հայտարարություններով։  Ընդ որում, գործարարի պաշտպանությունը եկեղեցուն իրավապահները «գնահատել» են որպես «իշխանության յուրացման կոչ» և կալանավորել նրան։ ՔՊ-ն ընդամենը երկու շաբաթվա ընթացքում մշակեց օրենսդրական փոփոխությունների նախագիծ, որը հնարավորություն է տալիս գործադիրին վերցնել ՀԷՑ-ի կառավարումը: ՔՊ-ի ներկայացրած օրենսդրական փաթեթը հենց ՔՊ-ի կողմից էլ ընդունվեց ԱԺ արտահերթ նիստում՝ 24 ժամվա ընթացքում:  Մասնագիտական համայնքը մտահոգված է՝ գույքերի պետականացման  իրավական և իրավաչափ որևէ գործիքակազմ չկա և ինչի էր կարող լինել, իսկ եթե Նիկոլ Փաշինյանի կողմից է հայտարարվում այդ գործընթացի մասին, ապա դա ոչ այլ ինչ է, քան՝ «բիզնես խլելու» գործընթաց և սահմանադրական կարգի տապալում, ինչն անընդունելի  է իրավական պետությունում։ Ավելին, մասնագիտական հանրությունը վստահ է, որ այս գործընթացը, որն ի սկզբանե քաղաքական է, տապալված է՝ միջազգային ատյաններում և որ վաղ, թե ուշ՝ այս գործընթացի հետևանքով հերթական վճիռն է լինելու՝ ընդդեմ ՀՀ-ի, իսկ ֆինանսական բեռը տարածվելու է ՀՀ հարկատուների վրա, այսինքն՝ այս իշխանությունների ապօրինությունների բեռը տարածվելու է քաղաքացիների վրա։   Այժմ ընդդիմադիր երկու խմբակցությունները դիմում են ներկայացրել ՍԴ՝ պահանջելով իշխանությունների կողմից ընդունված օրենքը ճանաչել Սահմանադրությանը հակասող, միևնույն ժամանակ, միջնորդել են, որ դիմումը վարույթ ընդունելու որոշմամբ՝ կասեցվի նաև օրենքի գործունեությունը՝ մինչև ՍԴ-ի կողմից վերջնական դատական ակտ կայացնելը։ 

Հուլիսի 11-ին ներկայացված դիմումը վարույթ ընդունելու մասին որոշում դեռևս չի կայացվել, համենայն դեպս՝ ՍԴ կայքում այդ մասին որևէ տեղեկություն չկա, ինչպես «Փաստինֆո»-ն տեղեկանում է դիմումատուներից՝ նրանք ևս պատասխան չեն ստացել։ 

Ընդ որում, սա այն դեպքում, երբ «Սահմանադրական դատարանի աշխատակարգ»-ի 27-30-րդ կետերի համաձայն՝ դիմումի նախնական ուսումնասիրությունը պետք է ավարտվեր դիմումը մուտքագրելուց հետո ոչ ուշ, քան՝ 30-օրյա ժամկետում, իսկ օրենքով նախատեսված այլ ժամկետներում դիմումի ուսումնասիրության համար պետք է աշխատակարգային նիստ հրավիրվի, այս մասին ևս, սակայն, որևէ տեղեկություն առկա չէ։ 

Ըստ այդմ,   ԱԺ ընդդիմադիր խմբակցությունների ներկայացուցիչ, «Հայաստան» խմբակցության քարտուղար Արծվիկ Մինասյանը օգոստոսի 28-ին դիմում է ներկայացրել ՍԴ՝ հայտնելով, որ որպես դիմումատուի ներկայացուցիչ տեղեկացված չէ օրենքի պահանջների պահպանմամբ ներկայացված դիմումի հետագա ընթացքի մասին, ինչը ոչ միայն գնահատում է Բարձր դատարանի կողմից օրենքի պահանջի անտեսում, այլև՝ լրջագույն կասկածներ են առաջանում ՍԴ դատավորների կողմից Սահմանադրական արդարադատություն իրականացնելու լիազորություններից հրաժարվելու վերաբերյալ։  Մինասյանը հիշեցրել է, որ դիմումով ներկայացվել է նաև միջնորդություն՝ դիմումը վարույթ ընդունելուց հետո վիճարկվող նորմատիվ դրույթների կասեցման մասին, ուստի, պատգամավորն ակնկալում է  ՍԴ նախագահից և դատավորներից հստակ պատասխան՝ օրենսդրական պահանջների խախտման վերաբերյալ, ինչպես նաև՝ եթե այս գործով առկա են ՍԴ աշխատակարգային որոշումներ, ապա պատգամավորը խնդրել է նաև տրամադրել այդ պատճենները։