Պատգամավոր հեշտ չեն դառնում, եթե խնամին մարզպետ չէ

Մամուլում շրջանառվող լուրերի համաձայն Արագածոտնի նախկին մարզպետ Սարգիս Սահակյանը «ցեխ է շպրտում մարզի պատգամավորների հասցեին և ասում, որ մարզի խնդիրները անտերության են մատնված: Նա վստահեցնում է, որ դրախտավայր կունենան, եթե ինքը 2017-ին պատգամավոր դառնա»:

Թե մասնավորապես ո՞ր պատգամավորի աշխատանքից է դժգոհ Սարգիս Սահակյանը, փոձեցինք պարզել հենց իրենից՝ հաշվի առնելով նաև, որ Սահակյանի հարաբերությունները դեռ վաղուց լարված էին Թալինի նախկին քաղաքապետ, այժմ ԱԺ ՀՀԿ խմբակցության պագամավոր Մնացական Մնացականյանի հետ:

«Բայց Ձեզ ի՞նչ, թե ում հետ եմ ես լարվում, ում հետ ինչ հարաբերությունների մեջ եմ: Դա իմ անձնական խնդիրն ա»,-newspress.am-ի հետ զրույցում ջղաձիգ տոնով ու վրդովված ասաց Սարգիս Սահակյանը՝ հավելելով, որ մարզի պատգամավորների հետ որևէ խնդիր չունի և նրանց աշխատանքից էլ դժգոհ չէ:

«Չկա նման բան, ես ոչ-ոքի հետ խնդիր չունեմ»,-դարձյալ ջղաձիգ տոնով ասաց նախկին մարզպետը:

Ինչ վերաբերում է պատգամավոր դառնալու հեռահար նպատակներին, ապա Սարգիս Սահակյանը նկատեց, որ դրան դեռ մեկ տարի ժամանակ կա, ու բացի այդ էլ «պատգամավոր հեշտ չեն դառնում»,-ասաց նա՝ հորդորելով. «Պինդ մնացեք ու էս հարցերով էլ ինձ չզանգեք…»:

Հ.Գ. «Պատգամավոր հեշտ չեն դառնում» բնորոշումը թերևս հարաբերական է, հատկապես, երբ խնամի-բարեկամներից որոշակի ակնկալիքներ ունես: Newspress.am-ի տեղեկություններով Սարգիս Սահակյանն իր անձնական կարիերային միտված քայլերում ակնկալում է իր խնամու՝ Գեղարքունիքի մարզպետ Ռաֆիկ Գրիգորյանի աջակցությունը:

Բանն այն է, որ Սարգիս Սահակյանի եղբոր աղջիկը Ռաֆիկ Գրիգորյանի հարսն է՝ որդու կինը: