Երևանում բուժում է ստանում լեյշմանիոզով հիվանդ ևս մեկ փոքրիկ. վիճակը նորմալ է

Newspress.am-ի տեղեկություններով` Երևանի Նորքի ինֆեկցիոն հիվանդանցում բուժում է ստանում լեյշմանիոզով հիվանդ փոքրիկ, նա մոտ 10 օր եղել է վերակենդանացման բաժանմունքում, այժմ տեղափոխվել է պալատ: Մեր տեղեկությունները հաստատեց ՀՀ առողջապահության նախարարի մամուլի քարտուղար Անահիտ Հայթայանը, նշելով, որ փոքրիկը Քանաքեռ-Զեյթուն վարչական շրջանից է, նրա մոտ վաղ ախտորոշվել է լեյշմանիոզ, այս պահին բուժում է ստանում, վիճակը նորմալ է:

Նա նաև նշեց, որ լեյշմանիոզ հիվանդությունը տարածված է երեք մարզերում՝ Լոռի, Տավուշ, Սյունիք, նաև Երևանում, հիմնականում մանկահասակ երեխաների շրջանում:

Հիշեցնենք, որ մարտի 9-ին Լոռու մարզի Շնող գյուղում լեյշմանիոզ հիվանդությունից մահացել է ինն ամսական երեխա: Աղջնակը նախ տեղափոխվել է գյուղի ամբուլատորիա, Ալավերդու բժշկական կենտրոն, այնուհետև՝ Երևան, Նորքի ինֆեկցիոն հիվանդանոց, սակայն երեխայի կյանքը փրկել չի հաջողվել:

Հավելենք, որ լեյշմանիոզները տարածված են տաք կլիմայական պայմաններ ունեցող երկրներում, այդ թվում նաև՝ Հայաստանի հարևան երկրների սահմանակից տարածքներում:

Նկատի ունենալով, որ լեյշմանիոզի ախտանշանները յուրահատուկ չեն, երեխաների մոտ անկանոն ջերմության դեպքում անհրաժեշտ է անհապաղ դիմել բժշկի, որպեսզի ժամանակին ախտորոշվի կամ հերքվի հիվանդությունը և հիվանդը ստանա համապատասխան բուժում:

Լեյշմանիոզից խուսափելու համար անհրաժեշտ է պաշտպանվել մլակների խայթոցից` մանրավանդակ ցանցով ցանցապատելով բնակարանների դռներն ու պատուհանները, մարմնի բաց մասերը ծածկել հագուստով կամ մաշկը մշակել հատուկ վանող նյութերով, պարբերաբար և ժամանակին հեռացնել կենցաղային թափոնները՝ կանխելով աղբակույտերի առաջացումը, քանի որ մլակները բազմանում են օրգանական աղբի կուտակումներում, պայքարել թափառող կենդանիների (շներ) դեմ: