ՀՀ-ում էլեկտրամոբիլները կկարողանան լիցքավորել` առանց նոր հաշվիչ տեղադրելու. օրինագիծ

Հայաստանում էլեկտրամոբիլներ ունեցող անձինք իրենց մեքենաների լիցքավորման համար կարիք չեն ունենա բաժանորդային նոր պայմանագիր կնքել լիցքավորիչի համար: «Էներգետիկայի մասին» ՀՀ օրենքում համապատասխան փոփոխությունների նախագիծը, որի համահեղինակներն են «Քաղաքացիական պայմանագրի» պատգամավորներ Ծովինար Վարդանյանը, Արուսյակ Մանավազյանը և Ալեն Սիմոնյանը, հավանության արժանացավ այսօր ԱԺ տնտեսական հարցերի հանձնաժողովում և կներկայացվի լիագումար նիստերի քննարկմանը:

Նախագիծը վերաբերում է ոչ միայն ֆիզիկական անձանց, այլև բիզնեսին։ Ձեռնարկատերերը կկարողանան իրենց խանութի կամ սրճարանի կողքին տեղադրել լիցքավորիչ՝ նույնպես առանց առանձին բաժանորդային պայմանագիր կնքելու։

«Հայաստան» խմբակցության պատգամավոր Թադևոս Ավետիսյանը նշեց, որ նախագիծը չի լուծում ինքնակամ միացումների խնդիրները, որոնք քաղաքացիներն իրականացնում են իրենց բնակարաններից: Արդյունքում բնակարաններից ավտոտնակներ մալուխները պատահականորեն միացվում են շատ բակերում, ինչը էլեկտրահարման վտանգ կարող է ստեղծել բնակիչների համար: Նա կոչ արեց այս խնդիրը ևս չանտեսել ու օրենսդրական փոփոխություններում նաև այս հարցը քննարկել։

Օրինագծի մեկ այլ դրույթի համաձայն՝ հստակեցվում է մինչև 500 կՎտ հզորությամբ ինքնավար էլեկտրակայանների կարգավիճակը, որոնք կառուցվել են 2018–2022 թթ.: Այժմ ինքնավար էլեկտրակայանի առավելագույն հզորությունը իջեցվել է մինչև 150 կՎտ: