ՀՀ սահմանային հանքերից արդյունահանում անելու համար հատուկ թույլտվություն է պետք. նախագիծ

ՀՀ ԱԱԾ–ն, ԱԳՆ–ն և ՊՆ–ն պետք է տան իրենց համաձայնությունը Հայաստանի սահմանային շերտերում ու սահմանային գետի ափերին գտնվող հանքերևակումներում ավազի և ավազակոպճային խառնուրդների պաշարների ուսումնասիրության կամ արդյունահանում իրականացնելու համար։ «Ընդերքի մասին» և «Վարչական իրավախախտումների մասին» ՀՀ օրենսգրքերում փոփոխություններ կատարելու մասին այս նախագիծը քննարկվեց և հավանության արժանացավ ՀՀ ԱԺ տնտեսական հարցերի մշտական հանձնաժողովի նիստի ժամանակ։

Եթե պետական իրավասու այս մարմինները որոշեն կասեցնել որևէ ընդերքօգտագործողի գործունեություն, ապա պետք է համապատասխան գրություն ներկայացնեն ՀՀ ՏԿԵՆ–ի տեսչական մարմին։

Բացի այդ, օրենսդրական փոփոխություններով առաջարկվում է գետի հունից ավազի արդյունահանման արգելք սահմանել` 20 մլն դրամի չափով վարչական տուգանք։

 

«Եթե տվյալ տնտեսվարողն իր լիցենզիայի գործունեության ընթացքում այս դեպքը կրկնի, ապա ընդերքօգտագործման իրավունքը ենթակա կլինի դադարեցման»,– ընդգծեց Վարդանյանը։

Նախագծով նաև պահանջ է սահմանվում, ըստ որի` օգտակար հանածոների արդյունահանման աշխատանքները պետք է իրականացվել բացառապես GPS համակարգով, որը սերվերային համակարգին պետք է անխափան միացված լինի։ Ըստ փոխնախարարի` այսպիսով հնարավոր կլինի բացահայտել ապօրինի օգտագործման դեպքերը։ Եթե GPS համակարգը տեղադրված չլինի, ապա տնտեսվարողը կտուգանվի 5 մլն դրամի չափով։