Եթե շտապ օգնությունը ՇՏԱՊ գար, կկարողանա՞ր փրկել տղայի կյանքը. Ժենյա Մայիլյանը 22–ամյա տղայի ջրահեղձության մասին

Այո, իսկապես 22 տարեկան մի երիտասարդ էր խեղդվում, որին ի վերջո հաջողվել էր ջրից հանել...

Այստեղ կարող էր լինել Վարդավառից մեր ուրախ նկարները և վիդեոները, բայց …

Վերջին երեք ամսվա մեջ երկրորդ անգամ եմ անդրադառնում Լոռու մարզում շտապ օգնությանը, եթե իհարկե կարելի է շտապ կամ օգնություն անվանել։ Այս մասին իր ֆեյսբուքյան էջում գրել է «Իրական աշխարհ, իրական մարդիկ» սոցիալական հասարակական կազմակերպության նախագահ Ժենյա Մայիլյանը։

«Երեկ Հաղպատ բնակավայրի ներքևի հատվածում, Դսեվանք կոչվող հանգստավայրում նշում էինք Վարդավառը։ Մի պահ բոլորը սկսեցին վազել, գոռալ, որ մարդ է խեղդվում։

Այո, իսկապես 22 տարեկան մի երիտասարդ էր խեղդվում, որին ի վերջո հաջողվել էր ջրից հանել։ Նա այդ պահին անգիտակից վիճակում էր, բայց կենդանի էր։ Տղային ջրից հանելուց հետո զանգել ենք շտապ օգնություն։ Ահավոր քաոտիկ իրավիճակ էր, բայց հետաքրքիր է, որ այդ տարածքում գտնվող 100-ից ավել մարդիկ արագ ինքնակազմակերպվեցին ու մեծ ու փոքր փորձում էին օգնել և տղային և լացող ու ուշաթափվող մարդկանց ինչով կարող էին, մինչ կժամաներ շտապ օգնության մեքենան։

Զանգից մոտ 35 րոպե անց մոտեցել են ԱԻՆ-ի 4 աշխատակիցներ, որից մոտ 5 րոպե հետո մոտեցել են պարեկային ծառայության 4-5 մեքենա։ Հետո, զանգից միայն 50 րոպե անց, մոտեցել է շտապ օգնության մեքենան։ Մեքենայում էր բուժքույրը, որը խիստ հուզված էր, որ իրեն տնից հանել են իր ազատ օրը և վարորդը։ Նույնիսկ բժիշկ չկար։

Տեղում գտնվող բոլոր մարդիկ ահավոր լարված, հուզված, վախեցած, բարկացած ու այո, նաև աֆեկտի մեջ էին, քանի որ իրենց ձեռքի վրա մահանում էր 22-ամյա երիտասարդ, իսկ իրենք ուղղակի սպասում էին ՇՏԱՊ ՕԳՆՈՒԹՅԱՆԸ։

Հոդվածում ստում են, որ Շտապ օգնության մեքենային հարվածել են մահացողի բարեկամները։ Հարվածողը ոչ մի բարեկամական կապ չի ունեցել նրա հետ, ավելին՝ այդ տղային առաջին անգամ էր տեսնում։ Գուցե վարորդը կամ բուժքույրը ոչ մի մեղք չունեն 50 րոպե անց հասնելու հարցում, բայց այդ պահին մահացող մարդուն փրկելու ազնիվ մղում ունեցող մարդը երկար վերլուծություններ չի անում, թե ով է մեղավորը։

Տեղանքը շատ բարդ էր ու անհարմար, հանգստացողները ԱԻՆ-ի տղաների հետ տղային բարձրացրին և տեղափոխեցին շտապ օգնության մեքենայի մեջ։

Մոտ 15 րոպե անց տեղեկացանք, որ տղան մահացել է ճանապարհին շտապ օգնության մեքենայի մեջ։

Իրականում հարցերը շատ-շատ են.

- Չգիտեմ, եթե շտապ օգնությունը ՇՏԱՊ գար, կկարողանար փրկել տղայի կյանքը, թե՝ ոչ։ Հուսամ այս հարցին դատաբժշկական փորձաքննությունը կպատասխանի։

- Արդյո՞ք Ալավերդի համայնքին հնարավոր չէր 5 պարեկի մեքենա տրամադրելու փոխարեն գոնե երկու-երեք շտապ օգնության բրիգադ տրամադրել։

- Եթե մենք այդքան ռեսուրս ունենք, որ Ալավերդի համայնքում կարողանում ենք թանկարժեք մի քանի մեքենաներով ոստիկաններ ունենալ, ապա ինչո՞ւ չենք վերանայում առողջապահության բյուջեն, ինչո՞ւ չենք կարողանում փոքր համայնքներում արժանապատիվ բժշկական ծառայություններ ապահովել։

- Արդյո՞ք մարզային բժշկական հաստատությունները ԱՆ ենթակայության տակ անցնելուց հետո քննարկվում է բժշկական ծառայությունների համաչափ հասանելիության հարցը։ Չգիտեմ։

Ցավակցում եմ երիտասարդի հարազատներին…», – գրել է նա։

Նշենք, որ հուլիսի 27–ին այս դեպքի մասին հայտնել է Oragir.News–ը, գրելով, որ շտապօգնության մեքենայի վրա հարձակվել են տղայի հարազատները։ Հուլիսի 28–ին լրատվամիջոցը տեղեկացրել է, որ մահացածը Ալավերդու բնակիչ Վաղինակ Սարոյանն է։ Նաև ականատեսներին հղում անելով գրել է, որ առվակը շատ բարակ էր խեղդվելու համար, հավանական է, որ տղան ցատկելու ժամանակ վնասվածք է ստացել։