Բռնազավթված Արցախում հրդեհի վտանգի տակ են հայտնվել Տիգրանակերտի արգելոցը, Ամարասի վանքը

«Սոցիալական ցանցերում շրջանառվող տվյալների համաձայն` հրդեհի հետևանքով արդեն վնասվել են Նոր Շեն համայնքի պատմական թթի այգիները։ Կրակի տարածումը հասել է նաև Նախիջևանիկ և Սեյդիշեն համայնքներ, որոնց տարածքում գտնվող եկեղեցիներն ու մշակութային արժեք ներկայացնող այլ կառույցներ կանգնած են անմիջական վտանգի առաջ»,- հայտնում են Արցախի մշակույթի նախարարությունից։

 

Շեշտում են՝ Ադրբեջանի Հանրապետությունը, ունենալով փաստացի վերահսկողություն բռնազավթված տարածքների նկատմամբ, միջազգային իրավունքի և մշակութային ժառանգության պաշտպանության վերաբերյալ կոնվենցիաների համաձայն պարտավոր է ապահովել մշակութային և բնական ժառանգության պահպանումը, ձեռնարկել անհետաձգելի միջոցներ հրդեհները մարելու և հասցված վնասները վերականգնման ուղղությամբ։

 

Նախարարությունը դիմում է նաև միջազգային կառույցներին և մասնագիտացված կազմակերպություններին՝ իրենց մանդատի շրջանակում պատշաճ գնահատական տալու ստեղծված իրավիճակին և իրականացնելու գործուն քայլեր Արցախի մշակութային ժառանգության պահպանման համար։