Չի ստացվելու երկակի խաղ խաղալ

 «Հրապարակ»-ը գրում է.

Ո՞րն է Փաշինյանի՝ Ալթայ մեկնելու նպատակը, եթե կոշտ հակառուսական հայտարարություններ են անում եւ խոսում ՀԱՊԿ-ից դուրս գալու մասին: Հայաստանի դեմոկրատական կուսակցության առաջնորդ Արամ Սարգսյանը նկատում է.

«Նա երբ զգում է, որ իր վիճակը լավ չէ, փորձում է հարաբերությունները կարգավորել Ռուսաստանի Դաշնության հետ: Այստեղ խնդիրը կապված է ռիսկերի հետ: Եթե Նիկոլ Փաշինյանն ամբողջապես հարաբերությունները փչացնի Ռուսաստանի հետ, ապա Հայաստանը դուրս կմղվի ԵԱՏՄ-ից, իսկ դա մեծագույն հարված կլինի Հայաստանի տնտեսությանը: Այս պահին որեւէ դիվերսիֆիկացիա, ինչպես իրենք են սիրում ասել, հնարավոր չէ, քանի որ ուրիշ շուկա այս պահի դրությամբ գրավել չեն կարող: Այդ պարագայում պարզ է, չէ՞, թե ինչպիսի հարված կլինի Հայաստանի տնտեսությանը, եթե ԵԱՏՄ-ից դուրս գա: Արդեն իսկ մեծ խնդիրներ կան: Հազարից ավելի բեռնատարներ կանգնած են Լարսում: Կոնյակագործների խնդիրն է շատ սուր դրված: Գուցե ժամանակին էլ կային նման խնդիրներ, սակայն այժմ Ռուսաստանը բացահայտ քայլեր է ձեռնարկում: Փաշինյանը ցանկացավ հանդիպել Միշուստինի հետ, սակայն, եթե նկատեցիք, Միշուստինը Փաշինյանի ժպիտին չարձագանքեց, իսկ դա նշանակում է, որ նրանց ծանր խոսակցություն է սպասվում, եւ դա իր պատճառներն ունի:

Առկա է նաեւ Սյունիքի խնդիրը` միջանցքի հարցը, ինչքան էլ Ռուսաստանը պնդի, որ այն 2 պետությունների հարցն է, միանշանակ է, որ ռուսական կողմը չի կարող անմասն մնալ, որովհետեւ այստեղ ոչ միայն խնդիրն այն է, թե ով է վերահսկելու ճանապարհը, այլ՝ այն, թե ինչպիսի աշխարհաքաղաքական պրոցեսներ տեղի կունենան, եւ ինչով կավարտվեն դրանք տարածաշրջանի, հատկապես` ՌԴ-ի համար: Եթե վերցնենք այն, որ Հայաստանը կարող է կորցնել իր պետականությունը, ապա Ռուսաստանն այդ պարագայում ուժեղ հարված կստանա հարավից, ինչից ակնհայտորեն խուսափում է: Ադրբեջանի հետ հարաբերությունները որքան էլ վատթարացել են, կողմերը պահպանում են հարաբերությունները, մի պարզ պատճառով` որեւէ տեղից երկրորդ ճակատ բացելու դեպքում Ռուսաստանը ծանրագույն հարված կստանա: Փաշինյանը շարունակելու է երկակի խաղ խաղալ, սակայն այս անգամ չի ստացվելու մի քանի լարի վրա խաղալը: Կոնֆերանսն ի՞նչ է, առանձնապես լուրջ հարցեր չկային մեզ համար, Մհեր Գրիգորյանն է մշտապես մասնակցել նման կոնֆերանսներին, այս անգամ Փաշինյանն է որոշել մասնակցել, իսկ դա նշանակում է, որ նա խոր տագնապներ ունի եւ այս քայլով փորձում է այն վերացնել»: