Փաշինյանի «թոզը նստել է» Ռոմանոս Պետրոսյանի վրա, իրեն միապետ է զգում. «Իրավունք»

«Հրապարակ» թերթը գրում է.

«Գործարար Սամվել Կարապետյանի կալանավորումից հետո ՀԷՑ-ում ստեղծված իրավիճակի իրավական և քաղաքական հետեւանքները դեռ կարող են երկար ժամանակ օրակարգում մնալ։ ՀԷՑ-ում տեղի ունեցող զարգացումները ոչ միայն իրավական, այլեւ խորապես քաղաքական բնույթ ունեն։ Կառավարությունը փորձում է արագ «խլել» ռազմավարական նշանակություն ունեցող կառույցը քաղաքական հայտ ներկայացրած Սամվել Կարապետյանից՝ կարծելով, թե այն կարող է որպես մահակ օգտագործել քաղաքական ընդդիմախոսի դեմ եւ լռեցնել նրան։ 

Կառավարության կողմից ՀԷՑ-ում ժամանակավոր կառավարիչ նշանակված Ռոմանոս Պետրոսյանը երեկ սկսեց իր պաշտոնավարումը՝ առաջին իսկ օրը ազդարարելով․ «էս սարն իմն է, էս ծառն իմն է»։ Պետրոսյանն ակնարկեց, որ ընկերության ղեկավար օղակում պատրաստվում է կադրային ջարդ անել։ Փաշինյանից հրահանգներ ստացած եւ մարտական տրամադրվածությամբ ՀԷՑ ժամանած Ռոմանոս Պետրոսյանը, իրեն միապետի տեղ դրած, մտավ մասնավոր հիմնարկ եւ անմիջապես ժամանակ տվեց ընկերության գլխավոր տնօրենի ԺՊ Դավիթ Ղազինյանին՝ ինքնակամ ազատել զբաղեցրած պաշտոնը։ Օրվա ավարտին Ռոմանոս Պետրոսյանն իր ձեռքով գրեց Դավիթ Ղազինյանի աշխատանքից ազատման հրամանը։ 

«Հրապարակ»-ի հետ զրույցում Դավիթ Ղազինյանը շեշտում է՝ ամբողջ գործընթացը համարում է անօրինական, «բեսպրեդել» և դատի է տալու Ռոմանոս Պետրոսյանին։ Հետաքրքրվեցինք` իսկ մյուս աշխատակիցներից ազատվողներ եղե՞լ են։ Ղազինյանն ասաց, որ ինքը հորդորել է, որ դուրս եկողներ չլինեն: Հիշեցնենք, որ պետության կողմից ժամանակավոր կառավարչի նշանակումն իրականացվել է նոր ընդունված օրենքի հիման վրա՝ ՀԾԿՀ նախագահի միանձնյա որոշմամբ։ Ղազինյանն ընդունում է, որ իրավական տեսանկյունից այդ քայլն իրականացվել է առանց օրենքի խախտման. «Հանձնաժողովի նախագահը նշանակել է, ինքն էլ եկել նստել է այդ աթոռին»։ Սակայն այստեղ ի հայտ է գալիս հիմնական կոնֆլիկտը՝ Սամվել Կարապետյանը դեռ սեփականատերն է, բայց կառավարումն իրականացնում է պետության կողմից նշանակված անձը։

ՀՀ կառավարության լիազոր մարմնի կողմից ներկայացված հաղորդման հիմքով ՀԾԿՀ նախագահը «Հայաստանի էլեկտրական ցանցեր» ՓԲԸ-ի նկատմամբ հարուցեց վարչական վարույթ եւ Ռոմանոս Պետրոսյանին նշանակեց ընկերության ժամանակավոր կառավարիչ։ Սա առաջին դեպքը չէ, երբ Հանրային ծառայությունները կարգավորող հանձնաժողովը հայտնվում է քաղաքական ճնշման կենտրոնում կամ դառնում է «գործիք»։ Բայց այս օրենքի պարագայում ընդդիմադիր խմբակցությունները Սահմանադրական դատարան են դիմել՝ ՀԾԿՀ որոշումը հակասահմանադրական ճանաչելու հարցով։

Խորհրդարանական ընդդիմադիր խմբակցություններն արդեն իսկ ՍԴ են դիմել՝ ՀԷՑ-ի կառավարման վերաբերյալ նոր ընդունված օրենքը վիճարկելով որպես հակասահմանադրական։ Արծվիկ Մինասյանը մեզ հետ զրույցում հայտնեց, որ միջնորդություն են ներկայացրել նաեւ օրենքի գործողության կասեցման վերաբերյալ։ Ո՞վ է «մաքրելու» ՔՊ-ականների հետեւից, եթե մինչեւ ՍԴ որոշումը կառավարիչը վնասներ պատճառի ՀԷՑ-ին եւ սեփականատիրոջը։ «Պատկերացրեք իրավիճակ՝ կառավարիչը հինգ ամիս կառավարում է, վնաս է տալիս, հետո ՍԴ-ն որոշում է՝ այդ ամբողջ հիմքը հակասահմանադրական է։ Այդ պարագայում ո՞վ է պատասխան տալու»,- ընդգծում է Դավիթ Ղազինյանը՝ հույս հայտնելով, որ ՍԴ անդամների «իրավական գիտելիքները» կուղղորդեն նրանց։

Ի՞նչ սպասել առաջիկայում: Սահմանադրական դատարանն ունի 20-օրյա ժամկետ՝ ՀԷՑ-ի վերաբերյալ հայցը վարույթ ընդունելու եւ կասեցման հարցը քննարկելու համար։ Մինասյանը նշում է՝ տեղեկություն չունեն՝ ՍԴ-ն հայցը վարույթ ընդունե՞լ է, թե՞ ոչ, անցել է արդեն մոտ մեկ շաբաթ։ Պատգամավորի խոսքով՝ օրենքն առնվազն երեք կետով հակասում է Սահմանադրությանը։ Ըստ նրա՝ այս ամսվա սկզբին ընդունված կարգավորումներով ընկերությունը կարող է զրկվել լիցենզիայից՝ առանց դատարանի որոշման, բացի այդ, հնարավորություն է ստեղծվել սեփականատիրոջը զրկել իր սեփականությունից՝ Սահմանադրությամբ չթույլատրված մեթոդներով: Ըստ ընդդիմադիր պատգամավորի, վիճահարույց է նաեւ այն, որ նոր ընդունված օրենքը թույլ է տալիս պատասխանատվության ենթարկել ընկերությանը` նախկինում թույլ տված խախտումների համար: «Օրենքում վիճահարույց մի շարք այլ կարգավորումներ եւս կան, որոնց վերաբերյալ Սահմանադրական դատարանը պետք է գնահատական տա: Արձանագրել ենք նաեւ միջազգային իրավունքի մի շարք խախտումներ, այդ թվում՝ Հայաստանի ստանձնած միջազգային պարտավորությունների։ Այս պայքարը միայն սեփականության իրավունքի մասին չէ, այլեւ Հայաստանի՝ իրավական, ժողովրդավարական պետության կառուցման մասին է»,- նշում է Արծվիկ Մինասյանը։

Մանրամասները` թերթի այսօրվա համարում