Կոխի տակն անցի, լխճի. Ի՞նչեր են նախորդել ու հաջորդել սարում «Վիլիս»-ով վրաերթի միջոցով սպանության փորձին (տեսանյութ)

Սարում երեկ «Վիլիս» մակնիշի մեքենայով փաստաբանին ու ոչխարների գողության հետևանքով տուժած քաղաքացուն վրաերթի միջոցով երկու անձինք 72 ժամով ձերբակալվել են։ Այս մասին Panorama.am-ին հայտնել է փաստաբան Գոռ Գևորգյանը։ Սպանության փորձի գործով փաստաբանն էլ է ճանաչվել տուժող, վաղը կանչվել է հարցաքննության։

Հիշեցնենք, որ նա երեկ մի տեսանյութ էր տարածել, որտեղ երևում է՝ ինչ որ մեկը մեքենան անկանոն վարում է՝ փորձելով վրաերթի ենթարկել ներկաներին։ Մեքենայից հետևից վազում էր մի ոստիկան։ 

Այս դեպքից առաջ՝ հուլիսի 16-ին  Շիրակի մարզում ազգությամբ եզդի քաղաքացուց 772 ոչխար են գողացել՝ պատճառելով մոտ 60 մլն դրամի վնաս։

«Ոստիկանության անգործության պայմաններում սկսեցինք մենք աշխատել։ Տեղեկություն հայտնեցին, որ ոչխարները գտնվում են Արագած լեռան վրա X վայրում։ Դիմում գրեցինք քննչական, վստահորդս ցուցմունք տվեց, խնդրեցինք, որ ոստիկաններ ուղեկցեն, քանի որ գիտեինք՝  վտանգավոր է։ Երբ հասանք այդ վայր, որտեղ գողոնը թաքցրել էին, հասակացան, որ բռնվեցին ու գողոնը պետք է հետ վերադարձնեն։ Ոստիկանության աշխատակիցները երեք հոգի էին, որևէ բան չէին կարող անել։ Այդ մարդիկ գնացին ծայրահեղ քայլի, ուզում էին ինձ և տուժողին վրաերթի ենթարկել, սպանել»,-ասաց Panorama.am-ի հետ զրույցում ասել է փաստաբանը։

Նրա խոսքով, եթե Շիրակի մարզի ոստիկանությունը տեղից իրար գար, ապա նման բան չէր լինի։

«Իրենց տեղում դոփելու, որևէ բան չանելու արդյունք է։ Անգամ խոսակցություններ էին պտտվում ու ականջիս հասնում, որ քրեականի տղաներն ասել են, էդ էր մնում, որ ոչխարի թեմայի մեջ պիտի թաթախվենք։ Երեք օր առաջ իրենց զգուշացրել էի, որ գիտենք, թե ովքեր են, որ ի վիճակի են սպանելու, քանի որ մի քանի անգամ հայտարարել են, թե սպանելու են»,-ասաց փաստաբանը։

Գողություն կատարածները Արմավիրի մարզի Մյասնիկյան գյուղից են։ Փաստաբանն ու տուժողը սարում տեսել են գողոնը, սակայն որևէ բան անել չեն կարողացել՝ սպանության փորձի պատճառով։

«Տարիքով հայրը եզդիերենով տղային ինչ-որ բաներ էր ասում, հետո ինձ թարգմանեցին, որ ասել է՝ կոխի տակը, անցի, լխճի։ Կարողացանք խույս տալ, փախնել։ Վստահորդիս ոտքին քարով խփեց, ընկավ, ուղղակի կարողացավ փախնել։ Հակառակ դեպքում մեքենան վրայով անցնելու էր։ Իրենց կամքից անկախ հանգամանքներում չընկանք մեքենայի տակ, թե չէ իրենց ամբողջ նպատակը մեզ սպանելն էր։ Եթե ոստիկաններն իրենց տեղում լինեին... անջատված վիճակ, ուրիշ կերպ չեմ կարող բնութագրել։ Ես իմ 20 տարվա գործունեության ընթացքում երբևէ  չէի տեսել նման անադեկվատ  վարքագիծ»,-ասաց փաստաբանը։

Նրա վստահորդը ծնկի շրջանում վնասվածք է ստացել, դատաբժիշկն ուղարկել է ԿՏ հետազոտության։

Գոռ Գևորգյանը հույս ունի, որ սպանության փորձ կատարվածների նկատմամբ որպես խափանման միջոց կընտրվի կալանավորումը։

«Սպանության փորձի պարագայում այլ բան ակնկալելու չէ, բացի այդ ինձանից հասանելիք ամեն ինչ անելու եմ, որպեսզի կալանավորվեն, քանի որ եթե նրանք հայտնվեն դրսում, ավելանալու է այն անձանց ղցանկը, որոնց կուզենան սպանել»,-ասաց փաստաբանը։