Սիրիայի նախագահը զգուշացրել է Իսրայելին. Սիրիան չի դառնա արտաքին պատերազմների ասպարեզ

Սիրիայի Արաբական Հանրապետության նախագահ Ահմադ ալ-Շարրան հայտարարություն է տարածել, որում ընդգծել է սիրիացի ժողովրդի վճռականությունը՝ պահպանելու երկրի տարածքային ամբողջականությունը արտաքին միջամտության պայմաններում։

«Սիրիացիները, իրենց հին պատմությամբ, միշտ մերժել են բաժանման ցանկացած ձև։ Մենք այս հողի զավակներն ենք, և հենց մենք ենք, որ կարող ենք դիմադրել իսրայելական կազմավորման՝ մեզ պառակտելու փորձերին», - ասել է նա։

Պետության ղեկավարը նշել է, որ դրուզները սիրիացի ժողովրդի անբաժանելի մասն են կազմում և ընդգծել, որ այս համայնքի պաշտպանությունը կառավարության համար առաջնահերթություն է։ Նրա խոսքով՝ Իսրայելը, նախորդ ռեժիմի անկումից ի վեր, ձգտել է Սիրիայի տարածքը վերածել հակամարտությունների ասպարեզ և թուլացնել երկրի ներքին միասնությունը։

Ալ-Շարրան ասել է, որ Սիրիան օտարերկրյա դավադրությունների և արտաքին նկրտումների փորձադաշտ չէ։ Նրա խոսքով՝ նոր Սիրիայի կառուցումը պահանջում է կենտրոնանալ երկրի շահերի վրա և չներքաշվել քաոսի մեջ։

«Մենք պատերազմից չենք վախենում, բայց մենք ժողովրդի շահերն ենք ընտրել ավերածությունների և անկարգությունների փոխարեն։ Մեր լավագույն ընտրությունը հայրենիքի միասնության պահպանումն է», - ընդգծել է նախագահը։ Նա ասել է, որ նահանգի անվտանգությունը հանձնվել է տեղական ուժերին: