ԴԱՀԿ-ի կողմից տնից վտարված ազատամարտիկը դիմում է Սերժ Սարգսյանին

Երեկ ԴԱՀԿ աշխատակիցները Արարատի մարզի Գետափնյա գյուղում գտնվող իր տնից վտարել էին ազատամարտիկ Խաչիկ Գասպարյանին և նրա ընտանիքի անդամներին: Արցախյան պատերազմի մասնակից, 5-րդ բրիգադի անդամ Խաչիկ Գասպարյանը newspress.am-ի հետ զրույցում նշեց, որ ինքը գիշերել է ընկերոջ տանը, ընտանիքի անդամերը` բարեկամներից մեկի տանը:

«Երեք եեխա ունեմ, իմ խնամքին է նաև սրտի կաթված ստացած մայրս: Ո՞վ է այսպիսի բան տեսել, վաշխառուից տոկոսով գումար վերցնես, վճարումը ուշացնես, հետո ամբողջությամբ վճարես ու հանկարծ դատարանը որոշի քեզ զրկել տնից: Ի՞նչ է իրենց հերն է էս տունը կառուցել, որ ակնհայտ կեղծիքներով տնից զրկում են»,- մանրամասնեց ազատամարտիկը:

Նա հիշեցրեց, որ 23 հազար ԱՄՆ դոլար վերցրել է 6 ամիս պայմանագրով հայտնի վաշխառու Արտակ Մաքսիմի Մարտիրոսյանից, ութ ամիս վճարումը ուշացրել է ապա 31 500 դոլար վերադարձրել, հետո արդեն վաշխառուն փորձել է դատարանի միջոցով ավել գումար կորզել, իսկ դատավորն իր վճռով ջրաղացին ջուր է լցրել:

«Դատավոր Բալյանի մոտ ասեց 10 հազար, հետո դատի ժամանակ 15 հազար, հիմա էլ 20 հազար տոկոս է ուզում»,-պատմեց Խաչիկ Գասպարյանը:

Նա նշեց, որ բաց նամակով պատրաստվում է դիմել Սերժ Սարգսյանին. «Գերագույն գլխավոր հրմանատար է, ազտամարտիկների աջակցության մասին իշխանությունը թողնես խոսի, դե թող տեսնեն` ինչ է կատարվում, երկրի համար արյուն ենք տվել, հիմա էլ պատրաստ ենք հարկ եղած դեպքում սահման գնալ»,- նշեց նա:

Խաչիկ Գասպարյանի եղբայրները ևս Արցախյան ազատամարտի մասնակիցներ են, նրանցից մեկը զոհվել է, երկուսը` երկրորդ կարգի հաշմանդամներ են:

Ազատամարտիկը նշեց, որ օգնության համար դիմել է նաև ԵԿՄ նախագահ Մանվել Գրիգորյանին , վերջինս օգնել է փաստաբանի հետ կապված հարցերում, բայց ասել է, որ չի կարող դիմել Միհրան Պողոսյանին, քանի որ կա դատարանի որոշում: