Կառավարությունը եւս 50 մլն եվրո վարկ կվերցնի Եվրոպական ներդրումային բանկից

ՀՀ կառավարությունն այսօր հավանություն տվեց Հայաստանի Հանրապետության և Եվրոպական ներդրումային բանկի միջև «Հայաստան - Դիմակայուն Սյունիք ծրագիր» ԿԶԵՀ+ Հատուկ ներդրումային պատուհան 1» ֆինանսական պայմանագրի ստորագրման առաջարկությանը:

Ըստ հիմնավորման՝ նախատեսվում է  ներդրումներ կատարել կարևորագույն հանրային ենթակառուցվածքներում, ինչպես նաև բարելավել Հայաստանի հարավային շրջանում տեղահանված բնակչության հիմնական ենթակառուցվածքային կարիքները, որոնք զգալիորեն տուժել են, ինչպես նշում է կառավարությունը՝ «Լեռնային Ղարաբաղի ճգնաժամից»։ 

Համաձայն Ֆինանսական համաձայնագրի՝  Ծրագրի ընդհանուր արժեքը կազմում է 50,000,000 եվրո վարկային միջոց, իսկ ՀՀ կառավարությունը պարտավորվում է  համաֆինանսավորել հարկերը, տուրքերը, Ծրագրի իրականացման հետ կապված գործառնական ծախսերը և մնացած այն ծախսերը, որոնք վարկային միջոցներից թույլատրելի չէ իրականացնել։

Ծրագրի Ֆինանսական համաձայնագրի ուժի մեջ մտնելու վերջնաժամկետ  է նախատեսվում Ֆինանսական  համաձայնագրի ստորագրման ամսաթվից հետո՝ 12 ամիս։         

Ծրագրի ավարտի ժամկետ է նախատեսվում Ֆինանսական  համաձայնագրի ուժի մեջ մտնելուց հետո 5 տարի։