Անգամ ամենալավ օրենսգրքով իշխանությունները կարող են անցկացնել ամենակեղծված ընտրությունները

Եթե Հայ ազգային կոնգրեսի քաշը կների, ուրեմն 4+4+4 ձևաչափն իրական է, իսկ եթե ոչ, ապա ոչ մի ձևաչափով էլ բանակացությունները արդյունք չեն տա:

Այս մասին newspress.am-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով ՀԱԿ-ի առաջարկած 4+4+4 բանակցային ձևաչափին:

«Այսինքն էստեղ խնդիրը ոչ թե զուտ ձևաչափի հետ է կապված, այլ այն առաջարկողների քաղաքական կշռի հետ: Եթե դիմացինդ ծանր քաշ ունի, ապա նրա բոլոր առաջարկությունները կընդունվեն, իսկ եթե չունի այդ կշիռը, ապա իշխանությունը կգտնի ոչ թե մեկ՝ այլ 401 տարբերակ մերժելու ցանկացած առաջարկ»,-ասաց քաղտեխնոլոգը:

Մյուս կողմից էլ, ըստ Արմեն Բադալյանի, ընտրական օրենսգիրքը մեծ հաշվով կապ չունի ընտրական գործընթացի հետ: Նրա խոսքով արդար ընտրությունների գնում են ոչ թե լավ ԸՕ-ով, այլ սկբունքայնությամբ:

«Երբ իշխանությունը կամքի ուժ կցուցաբերի, և թույլ չի տա իրեն դիմել ընտրակեղծիքների, ապա ամենավատ օրենսգրքով էլ կիրականացնեն ամենալավ ընտրությունները: Իսկ եթե իշխանությունը տեսավ, որ երկրի ներսում այդպիսի ուժ չկա և ցանկություն էլ չկա դրսում, ապա ամենալավ օրենսգրքով էլ նա կանցկացնի ամենակեղծված ընտրությունները: Այսինքն զուտ օրենսգիրքն ինքը ընտրական գործընթացի մեջ լավագույն դեպքում մեկ տոկոսի դեր է կատարում: Մնացած 99-ը դա ուժն է, որը կարող է ստիպել իշխանություններին ընտրություններն անցկացնել արդար»,-նկատեց քաղտեխնոլոգը:

Նա երկրի ներսում նման ուժ չի տեսնում: Ըստ Արմեն Բադալյանի՝ ընդդիմությունը այդ ուժը չունի, քանի որ եթե ունենար, ապա դեկտեմբերի 6-ի հանրաքվեին իր ոչ-ին կարող էր տեր կանգնել և դե յուրե կապահովեր ոչ:

Մյուսը արտաքին ուժն է. քաղտեխնոլոգը վստահ է, եթե ընդդիմությունը կարողացավ դրսի ուժի հետ լեզու գտնել և գալ փոխշահավետ համաձայնության, և երկուսով միասին ճնշեն իշխանության վրա, ապա իշխանությունը կվերցնի ցանկացած վատ օրենսգիրք ու ամենարդար ընտրությունները կանցկացնի: Իսկ եթե ոչ, ապա ոչինիչ չի փոխվի: