Կոմոնդոսի դրած հիմնաքարից մինչև «ՀԵՆՔ» ու «Ակադեմիական» ծրագրի մեկնարկ (տեսանյութ)

Տեղի ունեցավ «ՀԵՆՔ» համազգային բարեգործական հիմնադրամի «Ակադեմիական» ծրագրի հանդիսավոր բացումը և տարեկան վկայագրերի հանձնման արարողությունը։

Հանդիսավոր այս արարողությունը մեկնարկեց Հայաստանի և ՀԵՆՔ հիմնադրամի դրոշների յուրօրինակ մուտքով. կվադրոցիկլներին ամրացված դրոշները ծածանվելով՝ առաջնորդում էին «ՀԵՆՔ»-ի ուսանողներին։

Վերջիններս, դրոշների ուղեկցությամբ, մոտեցան կրթական կառույցի բակում գտնվող հուշաքարին և ծաղիկներ զետեղեցին՝ ի հիշատակ զոհված զինվորների։

Հուշաքարի մոտ, Արցախյան պատերազմում զոհված զինվորների հոգիների հանգստության համար իր աղոթքն առ Աստված բարձրացրեց Տեր-Պսակ քահանա Մկրտչյանը։ Վերջինս, արդեն դահլիճում, օրհնեց Ակադեմիական ծրագրի մեկնարկն ու իր խոսքում կարևորեց ՀԵՆՔ-ի գործունեությունը։

Միջոցառումն սկսվեց ՀԵՆՔ-ի հիմնով, որն ուսանողները հնչեցնում էին առաջին անգամ: Հիմնի խոսքերը հեղինակել է ուսանողներից Գոռ Մելքումյանը։

Բացման խոսքով հանդես եկավ ՀԵՆՔ ՀԲՀ-ի նախագահ փոխգնդապետ Արմեն Բայրամյանը, ով Արցախյան առաջին գոյամարտի մասնակից է: Նա ողջունեց ներկաներին ուներկայացրեց անցած ճանապարհը:

ՀԵՆՔ-ը ապահովում է ՏՏ ոլորտի բարձրակարգ կրթություն, որն իր մեջ կրում է միաժամանակ և՛ գիտական, և՛ բարեգործական, և՛ մարդկային այլ արժեքներ, որոնք ուղեկցելու են ՀԵՆՔ-ի սաներին ողջ կյանքի ընթացքում:

Պատահական չէ, որ «ՀԵՆՔ» -ի հիմնաքարը դրվել է ազգային հերոս, գեներալ-մայոր Արկադի Տեր֊Թադևոսյանի՝ հայտնի Կոմանդոսի անմիջական աջակցությամբ ու մասնակցությամբ։

Ի սկզբանե «ՀԵՆՔ»-ի նպատակն էր իր տանիքի ներքո հավաքել 2020 թվականի 44-օրյա պատերազմի մասնակից զինվորներին, հատկապես հաշմանդամություն ձեռք բերած զինվորականներին ու կամավորներին, օգնել նրանց կրթություն ստանալու և աշխատանք գտնելու հարցում՝ հեռանկարներ բացելով այդ տղաների համար:

Հիմնադրամն այսօր ոչ միայն պատվով է իրականացնում իր առջև դրված առաքելությունը, այլև ընդլայնել է իր գործունեությունը։ Կրթական ծրագրերում ընդգրկված են նաև Արցախից բռնի տեղահանված մեր քույրերն ու եղբայրները, ազատամարտիկների ընտանիքների անդամներ, հաշմանդամություն ունեցող անձիք և, ընդհանարպես, շնորհալի անհատներ, ովքեր ցանկություն են հայտնում միանալ ծրագրին ու ոչ միայն համապատասխանում են չափորոշիչներին, այլև հաղթահարում են կրթական ծրագրում ընդգրկվելու համար նախատեսված շեմը։

Հայրենիքի զորացման և երիտասարդ սերնդի կրթության գործում ներդրած ավանդի համար ՀԵՆՔ ՀԲՀ-ը և գործընկեր կազմակերպություններն ու անհատները ՀՀ Պաշտպանության նախարարի կողմից գերատեսչական մեդալներ և Շնորհակալագրեր ստացան Գերատեսչական մեդալներ և Պատվոգրեր, որոնք նրանց հանձնց Պաշտպանության նախարարի գլխավոր խորհրդական, գնդապետ Ռազմիկ Պետրոսյանը:

Առանձնահատուկ ուշադրության արժանացան նաև «Զատիկ» Երեխաների աջակցության կենտրոնի սաները, ովքեր եկել էին շնորհավորելու իրենց ավագ ընկերներին՝ երգով ու պարով:

Կենտրոնի ղեկավար Անգելինա Արշակյանը և ՀԵՆՔ տնօրեն Լիլիթ Սահակյանը պարգևատրվեցին փոխադարձ շնորհակալագրերով և պատվոգրերով՝ երկարատև և արդյունավետ համագործակցության համար:

Դասախոսների կողմից ուսանողներին հանձնվեցին վկայագրեր:

Շնորհակալագրերով պարգևատրվեցին նաև ՀԵՆՔ անձնակազմն ու դասախոսական կազմը:

Միջոցառման ընթացքում եղան նաև գեղարվեստական համարներ․ ուսանողներից բացի, իրենց կատարումներով հանդես եկան վաստակավոր արտիստներ Աննա Մայիլյանը (Մայիլյան -տրիո) և երգիչ, երգահան Դավիթ Ամալյանը: Հանդիսությունը վարում էր Արսեն Մանուկյանը:

Ամփոփելով միջոցառումը, Լիլիթ Սահակյանը շնորհակալություն հայտնեց բոլոր ներկաներին, ովքեր կարողացել ժամանկ գտնել և միանալ իրենց: Նա հույս հայտնեց, որ գորընկերային հարաբերություններն առաջիկայում էլ ավելի կընդլայնվեն ու ՀԵՆՔ-ը կներկայանանոր ծրագրերով:

Արմինե Մկրտումյան