Անդրանիկ Մարգարյան` քաղաքական դաշտում եզակի տեսակ

Մարտի 25-ը ՀՀ նախկին վարչապետ, պետական, քաղաքական գործիչ Անդրանիկ Մարգարյանի մահվան տարելիցի օրն է նրա մահվանից հետո ամեն տարի այդ օրը Մարգարյան ընտանիքն, նրա ընկերներն ու երկրի բարձրագույն ղեկավարությունը այցելում է Պանթեոն` խոնարհումի ու հարգանքի տուրք տալու նրա հիշատակին: Անդրանիկ Մարգարյանը ստանձնեց վարչապետի պաշտոնը մեր երկրի համար շատ ծանր իրավիճակում՝ թե՛ քաղաքական, թե՛ տնտեսական, թե՛ հոգեբանական, 99-ի ողբերգական դեպքերից հետո:

Նրա ղեկավարման 7 տարիների ընթացքում զգացվում էր, թե կառավարությունն ինչպես է քայլ առ քայլ, նպատակային առաջ գնում։ Անդրանիկ Մարգարյանը պետական այն գործիչն էր, որ դեպի նպատակը գնացող ճանապարհը շատ լավ էր տեսնում։ Բացի քաղաքական ու պետական գործիչ լինելուց Անդրանիկ Մարգարյանը կոլորիտային անհատականություն էր`հուզվող, զգացմունքային՝ արցունքակալվող աչքերով։ Միաժամանակ նա քաղաքական դաշտում երկու նժարները հավասարակշռողն էր։ Հաճախ էին նրան անվանում քաղաքական դաշտի «մերան»: Նրա ղեկավարման տարիներին հասարակությունը տեսնում էր հավասարակշռված քայլեր, և սխալներ, և թերացումներ, բայց որևէ հակամարդկային և հակաբարոյական քայլ չէր տեսնում: Անդրանիկ Մարգարյան տեսակը տարիներ շարունակ մնալով իշխանական վերնախավում կարողացավ չարատավորել մարդկային իր տեսակը: Իսկ սա Հայաստանում եզակի երեւույթ է:

«Կկարողանա՞ արդյոք Հայաստանն ունենալ նույնպիսի դրական վարչապետ, ինչպիսին էր Անդրանիկ Մարգարյանը», անգամ նրա մահվան օրերին այսպիսի հարց բարձրացրեց չեխական մամուլը: ԵՎ առհասարակ Անդրանիկ Մարգարյանին, նրա մահվան օրերին անդրադարձավ աշխարհի առաջատար մամուլը: