Նիդեռլանդները և Գերմանիան ահազանգում են՝ ՌԴ-ն խախտում է քիմիական զենքի արգելման կոնվենցիան

Ռուսաստանի կողմից Ուկրաինայում քիմիական զենքի կիրառման ինտենսիվությունը աճում է՝ խախտելով Քիմիական զենքի արգելման կոնվենցիան։ Այս մասին նախազգուշացնում են Նիդեռլանդների ռազմական հետախուզության և անվտանգության ծառայությունը (MIVD), ընդհանուր հետախուզության և անվտանգության ծառայությունը (AIVD) և Գերմանիայի արտաքին հետախուզության ծառայությունը (BND)։

Ինչպես տեղեկացնում է Նիդեռլանդների պաշտպանության նախարարությունը, Ռուսաստանն օգտագործում է ավելի հզոր քիմիական նյութեր, այդ թվում՝ քլորպիկրին։ Քլորպիկրինը կարող է մահացու լինել փակ տարածքներում բարձր կոնցենտրացիայով կիրառման դեպքում։ Հետախուզական տվյալները հաստատվել են նաև Գերմանիայի BND-ի հետ համագործակցությամբ։

«Մենք տեսնում ենք ոչ միայն քիմիական զենքի կիրառման ակտիվացում, այլ նաև աճող պատրաստակամություն՝ նման միջոցների օգտագործման։ Սա ահազանգ է ամբողջ Եվրոպայի և աշխարհի համար»,- նշել է MIVD տնօրեն, փոխծովակալ Պիտեր Ռիսինկը։

Պաշտպանության նախարար Ռուբեն Բրեքելմանսի խոսքով՝ Ռուսաստանը քիմիական զենք է կիրառում համակարգված և լայնածավալ ձևով։

«Այս զենքի կիրառման շեմի իջեցումը վտանգ է ոչ միայն Ուկրաինայի, այլև ամբողջ տարածաշրջանի համար։ Սա պահանջում է պատժամիջոցների ուժեղացում և Ուկրաինայի ռազմական աջակցության շարունակություն»,- ասել է նա։