Կստեղծվի հանձնաժողով՝ բնակարանային ծրագրին դիմած և աջակցություն չստացած արցախցիների դեպքերն ուսումնասիրելու համար

«Այս նախագծով առաջարկվում է սահմանել 4 մլն դրամ սահմանաչափով բնակավայրերի նոր ցանկ»,-կառավարության նիստում զեկուցեց ԱՍՀ նախարար Նարեկ Մկրտչյանը՝ ներկայացնելով բռնագաղթածներին բնակարանով ապահովելու ծրագրում կատարված փոփոխությունները։

Նախարարի խոսքով` ներկայում բնակավայրերի ցանկում ներառված է 57 համայնքի 452 բնակավայր, իսկ նոր նախագծով այն կավելանա և կհասնի 611 բնակավայրի և դրանց համար Արցախից բռնագաղթածների ընտանիքի յուրաքանչյուր անդամի համար սահմանում են 4 մլն դրամ։

Նարեկ Մկրտչյանը հայտնեց, որ մեկնարկել են ծրագրի 3-րդ և 4-րդ փուլերը և ներառելու է բռնագաղթածների բոլոր թիրախային խմբերին։

Ծրագրին դիմելու վերջնաժամկետը սահմանում է 2027 թվականի դեկտեմբերի 31-ը։

Մկրտչյանը հայտնեց, որ եթե բռնագաղթած ընտանիքն ավելի էժան ձեռք բերի բնակարանը, քան տրամադրած օժանդակությունն է, ապա մնացած դրական չափը ընտանիքը կարող է օգտագործել երեք ուղղությամբ՝ վերանորոգման վարձի վճարման, գյուղատնտեսական նշանակության հողամասի ձեռքբերման և կահույքի կամ կենցաղային տեխնիկայի գնման համար։

Նա նաև տեղեկացրեց, որ առաջարկվում է նաև ստեղծել միջգերատեսչական հանձնաժողով ծրագրին դիմած և աջակցություն չստացած դեպքերն ուսումնասիրելու համար։

«Հուլիսի 1-ի դրությամբ հավաստագիր է ստացել 1600 ընտանիք և իրացվել է ավելի քան 390-ը»,- ասաց Նարեկ Մկրտչյանը