«Ի՞նչ աճուրդ, դա լրագրողների ֆանտազիան ա». Սամվել Դարբինյանը` հողերի փակ աճուրդի մասին

Վարչական դատարանում մարտի 23-ին տեղի է ունեցել «Հետաքննող լրագրողներ» հ/կ-ն ընդդեմ Վանաձոր, Հրազդան, Աբովյան եւ Բալահովիտ համայնքների հայցադիմումի քննությունը: Գործով նշանակված առաջին դատական նիստին պատասխանող ճանաչված նշված 4 համայնքներից չէր ներկայացել Վանաձորի քաղաքապետը կամ նրա ներկայացուցիչը, իսկ Բալահովիտ համայնքի ղեկավարի ներկայացուցչի լիազորագիրը դատարանը համարեց ոչ պատշաճ, որի պատճառով նա չներգրավվեց դատական նիստին:

Հիշեցնենք, որ դեռեւս 2015 թ. հուլիս եւ օգոստոս ամիսներին «Հետաքննող լրագրողներ» հ/կ-ն դիմել էր գործով պատասխանող ճանաչված 4 համայնքների ղեկավարներին` խնդրելով կազմակերպության լրագրողներին թույլ տալ ներկա գտնվելու համայնքային սեփականության հողերի աճուրդ-վաճառքին` դիտարկելու եւ լուսաբանելու նպատակով:

Newspress.am-ը Վանաձորի քաղաքապետ Սամվել Դարբինյանից հեռախոսազրույցով փորձեց պարզել, թե ի՞նչ հողեր են հանվել փակ աճուրդի ժամանակ, ինչո՞ւ թույլ չեն տվել լրագրողներին մասնակցել և ինչո՞ւ չեն ներկայացել գործով նշանակված առաջին դատական նիստին:
Այս հարցը զարմացրեց Սամվել Դարբինյանին:

«Ի՞նչ աճուրդ, հիմա էդ ո՞վ ա տենց բան հորինել: Նման բան չի եղել, դա լրագրողների ֆանտազիան ա»,-վրդովված ասաց քաղաքապետը և հավանաբար ապահովության համար, կողքին կանգնած ինչ-որ մեկից փորձեց ճշտել. «Մենք աճուրդ արե՞լ ենք. ասում են աճուրդ ա եղել»,-հարցրեց Սամվել Դարբինյանը:

Նա, ում ուղղված էր հարցը հավանաբար հուշեց քաղաքապետին ինչ ասել, որից հետո Սամվել Դարբինյանն անմիջապես պատասխանեց. «Եթե աճուրդի մասնակցողները չեն ցանկանում, որ իրենց գնած հողի մասին իմանան, ապա այն փակ են անցկացնում: Սա օրենքով է սահմանված, գնացեք կարդացեք, հետո կզանգեք»,-ասաց քաղաքապետը և անջատեց հեռախոսը՝ չարձագանքելով դիտարկմանը, թե այս դեպքում, հիմքում ընկած է համայնքային շահը, որը գերակա է անձի շահին: