Երբ Նիկոլին պետք չլինես՝ քո ընկեր Սամվել Կարապետյանն այլևս քեզ օգնության չի կարող հասնել՝ դու նրան ձերբակալեցիր

Երբ ԱԱԾ արդեն նախկին ղեկավար Արմեն Աբազյանն ազատվեց պաշտոնից, անմիջապես լուրեր շրջանառվեցին, որ Նիկոլ Փաշինյանն ազատել է նրան՝ «Տաշիր գրուպ» և «ՀԷՑ» ընկերությունների սեփականատեր Սամվել Կարապետյանի տան առջև շոուներ չսարքելու համար։ Կան տեղեկություններ, որ Աբազյանն անգամ Փաշինյանին հորդորել է չգնալ նման քայլի, քանի որ դա ոչ միայն սխալ կլինի, այլև բացասական հետևանքներ կարող է ունենալ։

Առհասարակ, ըստ շրջանառվող լուրերի, Աբազյանը հաճախ է ընդդիմացել Փաշինյանի հրահանգներին, ու այս անգամ էլ սկզբունքայնությունը չի լքել նրան ու մնացել է իր դիրքորոշմանը։

Փոխարենը, նորանշանակ ոստիկանապետ Արամ Ղազարյանն արջի ծառայություն է մատուցել։

Հավանաբար, նա ցանկացել է վարձահատույց լինել Փաշինյանին՝ իրեն ՆԳՆ ոստիկանապետի պաշտոնին նշանակելու համար և ստանձնել է Սամվել Կարապետյանի ձերբակալության` իր համար «պատվավոր» գործը։ Գուցե Ղազարյանի համար իսկապես պատվավոր գործ էր «օճառային գործողություններով» ուղեկցվող անսկզբունքայնության համախտանիշով պայմանավորված ձերբակալությունը, բայց այն հաստատ չէր կարող լինել պատվաբեր՝ պատիվ բերել մի մարդու, ով քար է շպրտում իր խմած աղբյուրին։

Ավելի պարզ արտահայտվելու համար, չենք կարող չնշել, որ, ըստ մեր աղբյուրների, Սամվել Կարապետյանի հետ ունեցած հարաբերությունների ու հենց նրա շնորհիվ է Արամ Ղազարյանը 2023 թ. հունիսին նշանակվել  Տարածքային կառավարման և ենթակառուցվածքների նախարարության ենթակայությամբ գործող «Երևան ՋԷԿ» ՓԲԸ-ի գլխավոր տնօրեն։ Սամվել Կարապետյանը թերևս միայն այս հարցով չէ սատար եղել Արամ Ղազարյանին։ 

Այլ կերպ ասած՝ այս հարցում Արմեն Աբազյանն ավելի սկզբունքային է, քան նորանշանակ ոստիկանապետը, հատկապես, որ թե՛ փաստաբանները, թե՛ մասնագետները պնդում են, որ Սամվել Կարապետյանի հայտարարության մեջ, որի հիմքով նրան ձերբակալել ու կալանավորել են, որևէ հանցակազմ չկա։

Ստացվում է, որ Աբազյանը ոչ միայն ավելի սկզբունքային է, այլև գրագետ, ի տարբերություն Ղազարյանի։

Սա իր հերթին, մյուս կողմից էլ, դատելով «փաշինյանական քաղաքականությունից»` կարելի է ենթադրել, որ Փաշինյանը, իր մանկության ընկեր Վահե Ղազարյանի նման, կրտսեր Ղազարյանին ևս չի խնայելու և,  ինչ-որ Х պահի, զոհելու է իր քմահաճույքներին կամ պարզապես աթոռը պահելու համար։

Այնպես որ, Փաշինյանին հաճոյանալու և նրա քմահաճ ու անօրինական հրահանգները կատարելուց առաջ կարելի էր մի քիչ մարդ մնալ, որովհետև այս անգամ Սամվել Կարապետյանն այլևս քեզ օգնության չի կարող հասնի՝ դու նրան ձերբակալեցիր։

Արմինե Մկրտումյան