Եկեղեցին ու պետությունը անկախ միավորներ են՝ նույն ազգի ծառայությանը լծված․ Արամ Ա

Արամ Ա Վեհափառ Հայրապետը ընդունել է Ս․Դ․Հ․Կ․Ի կենտրոնական վարչության ներկայացուցիչներին․

Այս առաւօտ՝ Ուրբաթ, 27 Յունիս 2025-ին, Սուրբ Աստուածածին Վանքին (Պիքֆայա) մէջ, Ն.Ս.Օ.Տ.Տ. Արամ Ա. Վեհափառ Հայրապետին այցելեցին Սոցիալ Դեմոկրատ Հնչակեան Կուսակցութեան կեդրոնական վարչութեան ներկայացուցիչները, գլխաւորութեամբ ատենապետ Համբիկ Սարաֆեանի։ Ներկայ էին նաեւ Լիբանանի շրջանի վարիչ մարմինի անդամները։

Հանդիպման ընթացքին բնականաբար լայնօրէն քննարկուեցաւ մեր ժողովուրդը յուզող Հայաստանի մէջ ստեղծուած կացութիւնը։ Այս ծիրին մէջ մտահոգութիւններու ու տեսակէտներու փոխնակում կատարուեցաւ։

Վեհափառ Հայրապետը ներկաներուն յայտնեց այս բարդ կացութենէն դուրս գալու իր պատկերացումը, որուն համաձայն այս հանգրուանին անհրաժեշտ է հեռու մնալ հրապարակային արտայայտութիւններէ, որպէսզի կարելի ըլլայ հանդարտ մթնոլորտի մէջ հարցերու լուծման ճամբաներ որոնել։

Նորին Սրբութիւնը յիշեցուց, որ եկեղեցի ու պետութիւն անկախ միաւորներ են՝ նոյն ազգին ծառայութեան լծուած. հետեւաբար, իւրաքանչիւրը ներքին ճամբով կոչուած է իրեն առնչուած հարցերը քննելու ու համապատասխան որոշումները առնելու։ Մեկնելով մեր ազգին ներքին միասնակամութիւնը ամուր պահելու հրամայականէն, Արամ Ա. Կաթողիկոս Հնչակեան կուսակցութեան պատասխանատուներուն ըսաւ, թէ հրապարակային արտայայտութիւնները դադրեցնելու իր տեսակէտը նաեւ յայտնած է այլ կուսակցութիւններու եւ պիտի շարունակէ իր աշխատանքը, եւ իր նոյն պատկերացումը պիտի փոխանցէ Հայաստանի իշխանութեան։

Հանդիպումը առիթ հանդիսացաւ ընդհանուր գիծերով անդրադարձ կատարելու Լիբանանի հայ համայնքին։ Վեհափառ Կաթողիկոսը յատկապէս շեշտեց երեսփոխանական յառաջիկայ ընտրութիւններուն միասնական ոգիով ու համերաշխ մթնոլորտի մէջ մասնակցելու հրամայականը։