Կառավարությունը չհաստատեց Դավիթ Լոքյանի ներկայացրած որոշումը

Գյուղական համայնքներին գազաֆիկացման նպատակով 2012 թվականին տրամադրված գումարները դեռևս չեն մարվել: Այս մասին կառավարության նիստում հայտարարեց ՀՀ տարածքային կառավարման և զարգացման նախարար Դավիթ Լոքյանը՝ պարտքի մարման ժամկետը երկարաձգելու որոշումը ներկայացնելով կառավարության հաստատմանը:

Նախարարի խոսքով՝ 2012 թվականի պետական բյուջեով նախատեսված ՀՀ կառավարության պահուստային ֆոնդի հաշվին հատկացված փոխատվությունները համայնքները ֆինանսական միջոցների սղության պատճառով չեն կարողանում ժամանակին վերադարձնել: Այնպես, որ պահուստային ֆոնդի հաշվին հատկացված 249,300.0 հազ. դրամից գումար չի մարվել: Պարտքը վճաել են միայն Ուջան և Պտղավան համայնքները:

Այժմ Դավիթ Լոքյանը կառավարությանը առաջարկեց պարտքի մարման ժամկետը երկարաձգել ևս մեկ տարով՝ մինչև 2016 թվականի դեկտեմբերի 31-ը:

Վարչապետ Հովիկ Աբրահամյանը նկատեց, որ արդեն մեկ անգամ երկարաձգել են պարտքի մարման ժամկետը:

«Երկարաձգելով ոչ տոկոսներն են նվազում, ոչ էլ մայր գումարն է մարվում: Հարցը չի լուծվի, այստեղ այլ մոտեցում է հարկավոր»,- նկատեց վարչապետը:

Բացի այդ, վարչապետը նկատեց, որ 2 համայնք արդեն վճարել են և նրանց նկատմամբ անարդարացի կլիներ պարտքի վճարման ժամկետը երկարաձգելը կամ պայմանները մեղմելը:

«Պետք է հասկանալ, թե ինչու չեն վճարում, չեն կարողանում, թե կա այլ պատճառ: Սա խորքային հարց է, պետք է մի լավ քննարկել, հետո դնել հաստատման»,-եզրափակեց վարչապետը: