Ով է եղել Փաշինյանի հետ հանդիպած հոգևորականը. «Իրավունք»

«Իրավունք» թերթը գրում է.

«Նիկոլ Փաշինյանը Ֆեյսբուքից դուրս եկավ ու պարզեց, որ իրեն աջակցում են միայն թշնամական պետության մեջ՝ այն էլ միայն թշնամիները ու մեկ էլ հայ կաթոլիկ եկեղեցու ներկայացուցիչները:

«Իրավունք»-ի տեղեկություններով՝ Թուրքիայի մայրաքաղաք Անկարայում Նիկոլ Փաշինյանի հանդիպումը տեղի հայ համայնքի ներկայացուցիչների հետ անցկացվել է ակնհայտ սառնությամբ ու առանց Հայ Առաքելական Եկեղեցու ներկայության։ Պոլսո Հայոց Պատրիարքարանը բացահայտորեն մերժել է Փաշինյանի հրավերը՝ չմասնակցելով նրա հետ հանդիպմանը ո՛չ հոգեւորականների, ո՛չ էլ աշխարհիկ եկեղեցասեր ներկայացուցիչների մակարդակով։ Հանդիպմանը հատուկենտ մարդիկ են բերվել՝ լուսանկար ստանալու համար: Ավելին՝ ինչպես ավելի վաղ նշել էինք, Պատրիարք Գերաշնորհ Տ. Սահակ արքեպիսկոպոս Մաշալյանն այս օրերին անգամ Թուրքիայում չի եղել, այլ Միացյալ Նահանգներում է: Ընդ որում՝ Սուրբ Աստվածածին աթոռանիստ մայր եկեղեցում էլ Փաշինյանին դիմավորող, անգամ բարև տվող հոգեւորական կրկին չի գտնվել:

Այն փաստը, որ նույնիսկ հրավիրված լինելով՝ պատրիարքարանը բացակայում էր հանդիպումից ուղիղ մերժում է ո՛չ միայն Փաշինյանին, այլ նաեւ նրա վարած քաղաքական գծին։ Սակայն, պաշտոնական տարածած լուսանկարներում եւ տեսանյութերում երեւում է հանդիպմանը ներկա միակ հոգեւորականը՝ Վարդան ծայրագույն վարդապետ Ղազանչյանը՝ ՔՊ լոգոյով «Խաղաղության խաչմերուկ» թղթապանակը թեւի տակ, որը ոչ թե Առաքելական Եկեղեցու ներկայացուցիչ է, այլ Կաթոլիկ համայնքի։ Նա հանդիսանում է Թուրքիայի կաթողիկէ հայոց Պատրիարքական կառավարիչը։ Եվ այստեղ է, որ առնվազն հայ կաթոլիկները պիտի իրենք իրենց հարց տան, թե արդյոք իրենց էր ներկայացնում սույն վարդապետը, թե ինքն իրեն…

Փաստերը սկսում են հուշել, որ Փաշինյանը ՔՊ-ից բացի՝ ուրիշ ոչ մեկ չունի, բոլորին հայհոյեց, վատաբանեց, փնովեց ու մնաց միայնության մեջ:

Ի դեպ, Փաշինյանը Թուրքիայում այցելել է կապույտ մզկիթ: Հարց է առաջանում՝ եթե Փաշինյանի համար հայկական եկեղեցիներն ու հոգեւոր արժեքները «չուլանի» կարգավիճակ ունեն, ապա մզկիթ այցելությունն ի՞նչ է խորհրդանշում»։

Առավել մանրամասն թերթի այսօրվա համարում