Խնդիրները լուծելու համար եզդիները մանդատ չեն ուզում, այլ՝ պաշտոն

ՀՀ ընտրական օրենսգրքի նախագծով նախատեսվում է, որ Հայաստանում առավել մեծ համայնք ունեցող չորս ազգային փոքրամասնությունների՝ եզդիների, ռուսների, ասորիների և քրդերի ներկայացուցիչները պարտադիր պետք Է ընդգրկված լինեն քաղաքական ուժերի համամասնական ցուցակներում։ Եթե ոչ, ապա կուսակցությունը կարող Է չգրանցվել ԿԸՀ-ի կողմից, սակայն մամուլում շրջանառվում է, որ իշխանությունը որոշում է կայացրել ազգային փոքրամասնություններին ընտրացուցակներում ընդգրկելու պարտադիր նորմը հանել, կուսակցությունները արդեն իրենց հայեցողությամբ որշում կկայացնեն:

Newspress.am-ի հետ զրույցում եզդիական համայնքի ներկայացուցիչ, «Շամս» մարդասիրական ՀԿ-ի նախագահ Ռուստամ Բաքոյանը նշեց, որ ԱԺ-ում ազգային փոքրամասնության ներկայացուցիչ ունենալը կարող է դրական փոփոխություններ բերել, բայց իհարկե՝ ոչ մեծ, ուստի ներկայացուցիչ ունենալը սիմվոլիկ բնույթ կկրի:

«Կան հայ պատգամավորներ, որոնք ազգային փոքրամասնությունների խնդիրները միշտ բարձրաձայնում են, կարողանում ենք մեր ձայնը բարձացնել»,- մանրմասնեց նա:

Ըստ Բաքոյանի՝ ազգային փոքրամասնություններին պետք է ոչ թե խորհրդարանում տեղ հատկացնել, այլ դրա փոխարեն ներգրավել հատկապես մարզերում կառավարման համակարգի մեջ:

«Կարող են տալ, օրինակ, փոխմարզպետի պաշտոն, պաշտոններ՝ ոստիկանական և այլ համակարգերում, այս պարագայում փոքրամասնությունների խնդիրները ոչ միայն կբարձրաձայնվեն, այլ լուծելու հնարավորություններ կլինեն, ինչը ավելի արդյունավետ կլինի, քան ԱԺ-ամբիոնից հնչեցրած հայտարարությունները»,-եզրափակեց նա: