«Ճվճվ» Արոյի որդու հերթական արկածները

Newspress.am-ի տեղեկություններով` Երևան քաղաքի ավագանու անդամ, «Ճվճվ» Արո մականվամբ Արա Վարդանյանի տղան՝ 24-ամյա Սարգիս Վարդանյանը,երեկ՝ մարտի 23-ին, օրը ցերեկով, Արաբկիր վարչական շրջանում, BMW 7 մակնիշի ավտոմեքենայով բախվել և վնասել է ինչպես ոստիկանության, այնպես էլ մի շարք այլ մեքենաների:

Սահմանվածից ավելի մեծ արագությամբ վարելու և երթևեկության կարգը խանգարելու համար ՃՈ-ը փորձել է կանգնեցնել Սարգիսի մեքենան, սակայն վերջինս դիմել է փախուստի:

Նա չի կանգնեցրել մեքենան նույնիսկ, երբ ոստիկանության աշխատակիցները մեքենայով գնացել են նրա հետևից և բարձրախոսով հրահանգել կանգնեցնել մեքենան:

Ի վերջո ՃՈ աշխատակիցները մեքենաներով փակել են Սարգիսի ճանապարհը: Վերջինս, իր սկզբունքին համաձայն, ականատեսների վկայությամբ, այստեղ էլ աչքի է ընկել լկտի պահվածքով: Նա դարձյալ դիմել է փախուստի բախվելով և վնասելով իր ճանապարհը փակած ոստիկանության մեքենաներին:

Իսկ երբ փախուստի դիմած օրինազանցին ոստիկանները սկսել են նորից հետապնդել, վերջինս փախուստի ընթացքում իր ճանապարհին բախվել է և նորից վնասել է մի քանի մեքենաների:

Ավելի ուշ ոստիկաններին այնուամենայնիվ հաջողվել է բերման ենթարկել օրինազանցին ու ձերբակալել նրան:

Նկատենք, որ սա Սարգիս Վարդանյանի հետ պատահած միակ դեպքը չէ: Նա բազմիզս աչքի է ընկել արկածային ավտովթարներով, բացի այդ ժամանակին նրա մասին գրվեց, որ նրան ոստիկանությունը ավելի վաղ «Ճվճվ» Արոյի որդուն բերման է ենթարկել նաև թմրանյութ պահելու և օգտագործելու կասկածանքով: