Հայաստանի ամեն երրորդ բնակիչ ապրում է աղքատության շեմից ցածր. նոր զեկույց

Հրապարակվել է Հայաստանի կառավարության և ՄԱԿ-ի գործակալությունների նոր զեկույցը: Ըստ զեկույցի՝ 2014 թվականին Հայաստանի գրեթե ամեն երրորդ բնակիչ ապրում էր աղքատության շեմից ցածր։ Աղքատությունը կտրուկ ավելացել է տնտեսական ճգնաժամի հետևանքով, զուգահեռ աճել է նաև գործազրկությունը:

«Հայաստանի բազմաթիվ քաղաքացիներ աղքատության ու գործազրկության դժվարին պայմաններում ստիպված են եղել աշխատանքի հնարավորություններ փնտրել երկրից դուրս։ Դրամական տրանսֆերտները եկամտի կարևոր աղբյուր են բազմաթիվ տնային տնտեսությունների համար: Չնայած նրան, որ տրանսֆերտները 2015 թվականից սկսել են նվազել, դրանց բաժինը Հայաստանի ՀՆԱ-ում շարունակում է կարևոր դեր ունենալ»,- արձանագրել են զեկույցի հեղինակները, ովքեր իրավիճակը դիտարկել են սկսած 2008 թվականից մինչև 2014 թվականը:

Այս փաստաղթղթում տեղ գտած ցուցանիշները մտահոգիչ են նաև սոցիալական բևեռվածության մասով: Զեկույցում նշվում է, որ չնայած նախորդ տասնամյակում Հայաստանում գրանցված տնտեսական աճին, պարենային ապահովության խնդիրը նախորդ 5 տարիներին չի փոփոխվել. պարենային ապահով և անապահով տնային տնտեսությունների տարբերությունը գնալով ավելանում է, և առավել կարիքավորները մնում են հետևում։ Ըստ զեկույցի պարենային անապահովությունը առավել լայն տարածում ունի Շիրակում և Լոռիում՝ 17 տոկոս, Տավուշում և Երևանում՝ 18 տոկոս, անապահովության տոկոսը գերազանցել է ազգային միջինը:

Ըստ զեկույցի հեղինակների՝ պարենային անապահով տնային տնտեսություններն ավելի քիչ ներդրում են կատարել կրթության զարգացման համար և ավելի ցածր կրթական մակարդակ ունեն, քան պարենային ապահով և խոցելի տնային տնտեսությունները։ 2014 թվականին Հայաստանի 5 տարեկանից փոքր երեխաների 19 տոկոսը թերաճ է եղել, իսկ 15 տոկոսը՝ գերքաշ։

Երեխաների թերաճությունը զգալիորեն պայմանավորված է տնային տնտեսության աղքատությամբ: Զեկույցի հեղինակներն արձանագրել են, որ համաշխարհային ու տարածաշրջանային տնտեսությունների անկայունությունը խոչընդոտում է Հայաստանի տնտեսական զարգացմանը:

«Վերջերս տեղի ունեցած համաշխարհային և տարածաշրջանային տնտեսական ճգնաժամերը շրջեցին Հայաստանի աղքատության նվազեցման ձեռքբերումները՝ մղելով բազմաթիվ կարիքավոր տնային տնտեսությունների աղքատության շեմից ցած։ Այս ազդեցություններն ընդգծում են Հայաստանի կախվածությունը արտաքին տնտեսություններից և համաշխարհային տնտեսության ցնցումների նկատմամբ երկրի ընդհանուր խոցելիությունը։ Ռուսաստանի ճգնաժամը և համաշխարհային տնտեսության անկայունությունը խոչընդոտում են Հայաստանի զարգացումը և սպառնալիք են ստեղծում երկրի պարենային ապահովության համար»,- նշվում է զեկույցում: