Հյուսիսային Իռլանդիայում երրորդ օրն է, ինչ շարունակվում են միգրանտների դեմ բողոքի ցույցերը

Հյուսիսային Իռլանդիայում արդեն երրորդ օրն է, ինչ տեղի են ունենում անկարգությունների վերածված հակամիգրանտային բողոքի ցույցերը:

Այս մասին հաղորդում է The Times թերթը:

Բալիմենա քաղաքում ցուցարարները կրկին մոլոտովի կոկտեյլներ, հրավառություններ և քարեր են նետել իրավապահ մարմինների աշխատակիցների վրա։ Ի պատասխան՝ ոստիկանությունը ջրցան մեքենաներ և պլաստիկե փամփուշտներ է օգտագործել ցուցարարներին ցրելու համար։ Այս անգամ անկարգությունները տարածվել են հարևան Լարն քաղաքում, որտեղ ցուցարարները հրդեհել են հանգստի կենտրոնը, որտեղ ապաստան էին գտել Բալիմենայից իրենց տների ավերման հետևանքով տեղահանված մարդիկ։

Բալիմենայում հակամիգրանտային բողոքի ցույցերը սկսվել են հունիսի 9-ի երեկոյան՝ անչափահաս աղջկա ենթադրյալ բռնաբարությունից հետո։ Դեպքից հետո ձերբակալվել են 14 տարեկան երկու դեռահասներ։ Հունիսի 9-ին նրանք ներկայացել են քաղաքային դատարան, որտեղ նրանց մեղադրանք է առաջադրվել բռնաբարության փորձի համար:

Ինչպես հաղորդում է BBC-ն, կասկածյալները դատավորի հարցերին պատասխանել են ռումինացի թարգմանչի օգնությամբ։