Դիլիջանի թունելի անմիջապես կողքով նոր թունել կկառուցվի. հինը կօգտագործվի վթարային իրավիճակների համար

Դիլիջանի թունելը հիմնամորգման կարիք ունի, սակայն գործադիրում առաջարկվել է մեկ այլ տարբերակ՝ նոր թունել կառուցել։ Ազգային ժողովում 2024-ի պետբյուջեի կատարողականի նախնական քննարկումների ժամանակ հայտարարեց ՏԿԵ նախարար Դավիթ Խուդաթյանը նշեց, որ հիմնանորգման դեպքում հարկավոր էր նաև Սեմյոնովկայով անցնող ճանապարհը միջպետական ստանդարտների բերել, ինչը լրացուցիչ ծախս է ենթադրում։

Բացի այդ, հիմնանորգման արդյունքը, նրա խոսքով, կարճաժամկետ էր լինելու։

«Թունելը շահագործման հանձնելուց հետո մենք այդ ստանդարտներին համապատասխանող այդպիսի ճանապարհի կարիք, մեծ հաշվով, էլ չէինք ունենալու, որովհետև ինչպես հիմա, այդպես էլ թունելի շահագործման հանձնելուց հետո հիմնական երթևեկությունը դեպի Տավուշի մարզ անցնելու էր թունելով: Այս երկուսի պարագայում, այսինքն՝ «թունելի հիմնանորոգում + Սեմյոնովկայի ճանապարհը միջպետական ստանդարտներին բերելը», նույն ֆինանսական հետևանքներն էին առաջացնելու բյուջեի համար, ինչ նոր թունելի կառուցումը»,-ասաց նա:

Ի վերջո, որոշում է կայացվել Դիլիջանի թունելի անմիջապես կողքով նոր թունելի կառուցել։

Այժմ նախարարությունում նախագծի վրա են աշխատում:

«Առաջիկայում ավելի կոնկրետություն կունենանք, թե կոնկրետ որ հատվածով կանցնի թունելը, բայց այդ մասով վերջնական որոշում ունենք»,- ասաց նախարարը;

Դրան զուգահեռ թունելը նորոգման կենթարկվի, որը հնարավոություն կտա երթևեկը պահպանել այնքան, ինչքան անհրաժեշտ կլինի մինչև նոր թունելի կառուցման և շահագործման հանձնելը։

«Գոյություն ունեցող թունելը կմնա որպես երկրորդ թունել, այսինքն՝ վթարային իրավիճակների համար: Այս կերպ այդտեղ էլ անվտանգության մակարդակը էականորեն կբարձրանա»,- ասաց նա: