VivaCell MTS-ը գումարներ է շորթում բաժանորդներից

Հայաստանյան որոշ բջջային օպերատորներ ամենատարբեր եղանակներով գումարներ են շորթում բաժանորդներից:
Newspress.am-ի հետ զրույցում VivaCell MTS-ի բաժանորդներից մի քանիսը օրերս դժգոհեցին, թե օպերատորն իրենցից գումարներ է տանում չօգտագործված րոպեների համար:

2 օր առաջ էլ հենց newspress.am-ի թղթակցի հետ տեղի ունեցավ միջադեպ: Նրա հեռախոսահամարի հաշվին փոխանցված 500 դրամը մի քանի ժամ անց զրոյացվել է այն դեպքում, երբ որևէ զանգ չի կատարել:

Վերջինս անմիջապես զանգահարել է օպերատորին: Ճշտող հարցին, թե ինչու է իր հաշիվը զրոյացած՝ VivaCell-ի աշխատակիցը պատասխանել է, թե նույն օրը երեկոյան զանգ է կատարվել իր հեռախոսից:

«Եթե դա պատմեր մեկ այլ մարդ, գուցե թերահավատորեն ընդունեի, բայց իմ հեռախոսից հաստատ ոչ մի զանգ չի եղել: Ես նշված ժամին աշխատում էի ու հեռախոսս էլ դրված էր հենց իմ դիմաց»,- վրդովված պատմեց գործընկերս:

Թե որքանով է հնարավոր տեխնիկապես միջամտել բաժանորդի հեռախոսազանգերին` փորձեցինք ճշտել հենց իրենցից՝ VivaCell-ի աշխատակիցներից, ովքեր միանշանակ հերքեցին, թե տեխնիկապես նման բան հնարավոր չէ:

Տեղեկատվության անվտանգության փորձագետ Սամվել Մարտիրոսյանը newspress.am-ի հետ զրույցում նկատեց, որ վերջերս Ռուսաստանում են նման դեպքեր գրանցվել, որոնք մեծ աղմուկ են բարձրացրել:

«Սմարթվոն հեռախոսները երբեմն նման վիրուսներ տարբեր եղանակներով քաշում են: Դա կարող է լինել ինտերնետից որևէ բան քաշելու, կամ էլ SMS-ի միջոցով: Գալիս է որևէ SMS, բացում ես այն ու գնում հետքով, պարզվում է` վիրուս է»,- բացատրեց Մարտիրոսյանը:

Նա չի բացառում, որ հենց նման տարբերակով հեռախոսի մեջ ներքաշված վիրուսը կարող է զանգեր կատարել տվյալ հեռախոսահամարից ու զրոյացնել գումարը:

«Սա մի ձև է, որով բջջային օպերատորները գումարներ են շորթում բաժանորդներից»,-նկատեց ՏՏ ոլորտի փորձագետը: