Ժողովուրդ ջան, մենք չենք, էս չինովնիկն է․ նստած՝ իրան էշի տեղ է դրել, ասում է՝ քանի քաղաքապետարանին մեղադրում են, լավ ա էլի, մարաղը մտած ինքը չի երևում, է հետո՞․ Ավինյան (տեսանյութ)

«Կա պետական գույք, որը փաստացի ջրային կոմիտեի բալանսում ա, ու ինքն ընենց տեր չունի, օդում կախված է, ու 400 վթար մեկ շաբաթվա ընթացքում»։ Այս մասին գործակարգավարական խորհրդակցության ժամանակ ասաց Տիգրան Ավինյանը՝ անդրադառնալով կոյուղու համակարգում արձանագրված վթարների խնդրին։

«Մեկ-երկու լրագրող, որ հատուկ դրա վրա ֆիքսված են՝ ենթադրաբար նաև այլ նպատակներով, որ ասեն՝ տեսեք-տեսեք քաղաքապետարանը... Մինչդեռ քաղաքապետարանի խնդիրը չէ։ Քաղաքապետարանը լուծում է ոչ իր խնդիրը ու նվեր տալիս կառավարությանը»,- ասաց Տիգրան  Ավինյանը՝ նշելով, որ շատ դեպքերում այդ կոյուղիները քաղաքապետարանի լիազորության ներքո չեն, բայց քննադատությունն իրենց են ուղղում, և այն միտումնավոր է արվում։

Ավինյանը հայտնեց, որ այդ կոյուղագծերը պետական գույք են, հանձնված չէ «Վեոլիա Ջուր»,- ընկերությանը։ Նա հայտարարեց, թե պետք է հասկանալ, թե ովքեր են պատասխանատուները, քանի որ 2016 թվականից այդ հարցի պատասխանը չի հստակեցվել։

«Պարզենք՝ ո՞վ է այդ պատասխանատու օղակը՝ ասենք. «Պատասխանատու օղակ, սա քո գործն է, գնա արա»։ Որովհետև անընդհատ՝ մեկ, երկու, երեք, չորս, հինգ, վեց... քաղաքապետարանը էս, քաղաքապետարանը էն։ Վերջն ասելու ենք՝ մենք չենք ժողովուրդ ջան, էս մարդն է, էս չինովնիկն է, նստած` իրան ըտենց էշի տեղ է դրել, ասում է` քանի քաղաքապետարանին մեղադրում են, լավ ա էլի, մարաղը մտած ինքը չի երևում, է հետո՞, լա՛վ»,- հայտարարեց Ավինյանը։