Մարզերում իրականացվում է աշխատանքային ծրագիր՝ անապահով ընտանիքների համար

Ցանելու, էտելու, վարելու համար շահառուն սահմանված աշխատանքային գրաֆիկով յուրաքանչյուր աշխատանքային օրվա համար ստանում է 4 հազար դրամ:

Այդ մասին հայտնել է ՀՀ աշխատանքի և սոցիալական նախարարության զբաղվածության գործակալության պետ Արտակ Մանգասարյանը՝ ներկայացնելով մարզերում մեկնարկած զբաղվածության ապահովման այն ծրագրերը:

«Սեզոնային զբաղվածության խթանման միջոցով գյուղացիական տնտեսության աջակցության տրամադրում» ծրագիրը Հայաստանում գործում է արդեն չորրորդ տարին:

Սեփականություն հանդիսացող սեփականաշնորհված կամ օրինական ձևով վարձակալված տարածքներում մարդիկ գյուղատնտեսության նախարարության կողմից հաստատված գործարար ծրագրերով կարող են յուրաքանչյուր օրվա համար վաստակել 4 հազար դրամ, ներառյալ` եկամտային հարկը: Շահառուի ընտանիքի անդամները ևս կարող են ընդգրկվել ծրագրում: Հողում կարող են ցանել ամեն ինչ, կարող են այգի մշակել: Արդեն հաշվառվել է ավելի քան 4000ց շահառու, անցյալ տարի կնքվել է 4 000-ից ավել պայմանագիր, ավելի քան 6000 հոգի աշխատավարձ է ստացել:

Շահառուները դիմում են մարզպետարաններին, որոնք էլ շահառուների անունը ներկայացնում են Աշխատանքի և սոցիալական հարցերի նախարարություն: Գերատեսչությունն էլ ներկայացնում է զբաղվածության պետական գործակալությանը, որի մասնագետները հաշվառում են ծրագրին դիմողներին, ուսումնասիրում այդ մարդկանց հողակտորները և դրանց հետ կապված փաստաթղթերը: Կազմվում է պլան-ժամանակացույց՝ 6 ամիս տևողությամբ, և տրվում է 350 հազար դրամ, բայց ոչ՝ միանվագ:

«Օրվա աշխատանքի համար ընտանիքի յուրաքանչյուր անդամ ստանում է 4 հազար դրամ: Ծրագիրը նախապատվությունը տալիս է այն անձանց, ովքեր համարվում են աշխատաշուկայում անմրցունակ, ովքեր նպաստառու են, գրանցված են որպես գործազուրկ կամ ունեն երկու և ավելի անչափահաս երեխաներ կամ հաշմանդամ` ընտանիքում»,- ասաց Արտակ Մանգասարյանը: