Գյուղատնտեսական կենդանիների պատվաստումը, ըստ ամենայնի, չի իրականացվում

ՀՀ վերահսկիչ պալատը ստուգումներ է իրականացրել ՀՀ գյուղատնտեսության նախարարությունում, մասնավորապես դիտարկվել է ՀՀ պետական բյուջեից հատկացված միջոցների օգտագործման, բյուջետային մուտքերի ապահովման, ինչպես նաև պետական սեփականություն հանդիսացող միջոցների կառավարման օրինականությունը 2015 թվականի մարտի 23-ից մինչև 2016 թվականի փետրվարի 10-ը:

Վերահսկողությամբ ընդգրկվել են Գյուղատնտեսական կենդանիների պատվաստում ծրագիրը, որն իրականացվում է երկու բաղադրիչներով՝ Կենսապատվաստուկների ձեռք բերում և հակաանասնահամաճարակային միջոցառումների կազմակերպում:

ՎՊ-ն նշում է, որ 2014-2015թթ.-ին իրականացվել է կենդանիների վարահսկիչ հիվանդությունների կանխարգելմանն ուղղված հակաանասնահամաճարակային միջոցառումներ հետևյալ հիվանդությունների նկատմամբ`բրուցելյոզ, տուբերկուլյոզ, սիբիրախտ, դաբաղ, խշխշան պալար, պաստերելյոզ, բադզոտ, բասական ժանտախտ, վարրոատոզ:

«Գյուղատնտեսական կենդանիների պատվաստում» ծրագրով պատվաստանյութերի ձեռքբերման և հակահամաճարակային միջոցառումների իրականացման համար 2014թ-ին նախատեսվել է 1,120,742.3 հազ. դրամ, իսկ 2015թ-ին՝ 1,162,214.8 հազ. դրամ:

ՎՊ-ն նշում է, որ 2014-2015թթ.-ի համար ներկայացվել են իրարամերժ տեղեկություններ, այսպես՝ օրինակ, տրամադրված տեղեկանքներում խոշոր եղջերավոր կենդանիների` կովերի ծինը հաշվարկվել է 2014թ-ին 80%-ով, իսկ 2015թ-ին 90%-ով: Դաբաղ հիվանդության նկատմամբ մանր եղջերավոր կենդանիներն ամբողջությամբ չեն պատվաստվում, օրինակ՝ առկա են համայնքներ որտեղ մանր եղջերավոր կենդանիների մի մասը պատվաստվում են, իսկ մյուս մասը` ոչ, այստեղ բացակայում է որևէ տրամաբանություն: ՎՊ-ն պարզել է, որ հակահամաճարակային միջոցառումների իրականացման և անհրաժեշտ պատվաստանյութերի ձեռք բերման հաշվարկների վերաբերյալ կարգ գոյություն չունի, կամ պլանավորման դաշտը կարգավորված չէ:

Այսպիսով, ՎՊ-ն ամփոփել է, որ հակահամաճարակային միջոցառումների իրականացման և անհրաժեշտ պատվաստանյութերի ձեռք բերման հաշվարկների վերաբերյալ կարգ գոյություն չունի, կամ պլանավորման մասով դաշտը կարգավորված չէ:

Այնպես, որ պետք էր Վերահսկիչ պալատի ուսումնասիրությունը, որպեսզի պարզվեր` Հայաստանում պետական ծրագրով իրականացվող պատավստումները հավուր պատշաճի չեն կատարվում, իսկ օրինակի համար դաբաղի, բրուցելոզի, թեյլերոզի և այլ հիվանդությունների գլուխբարձրացման համար կան հիմնավոր պատճառներ, գուցե դա է պատճառը, որ պատասխանատու մարմինը, որն ի վերջո գյուղատնտեսության նախարարությունն է դաբաղի կամ բրուցելոզի դեպքերը հանրությանը ներկայացնելու փոխարեն՝ փորձում է կոծկել: