Կաթողիկոսը զավակ ունի՞, թե՞ ոչ. Արշակ Uրբազանի պատասխանը

Ձեզ թվում է, որ գոյություն ունեն սխալ պատասխաններ, բայց գոյություն ունեն ավելի շատ սխալ հարցեր. սխալ հարցերը չեն կարող ունենալ պատասխաններ: Այս մասին այսօր լրագրողների հետ զրույցում ասաց Մայր Աթոռ Ս. Էջմիածնի դիվանապետ Արշակ եպիսկոպոս Խաչատրյանը՝ անդրադառնալով Նիկոլ Փաշինյանի գրառմանը, որ պետք է պարզել` արդյոք Գարեգին Բ-ն խախտել է կուսակրոնության ուխտը և երեխա ունի, թե ոչ։ «Ու եթե ունի երեխա, ապա նա չի կարող լինել Ամենայն հայոց կաթողիկոս»,- գրել էր Փաշինյանը։

«Սխալ հարցադրումները չեն կարող հնչեցվել, առավել ևս պատասխանատվություն ունեցող անձանց կողմից»,- ասաց նա։

Հարցին՝ հնարավո՞ր է, գործադիր իշխանությունն այնքան մխրճվի եկեղեցոիւ հոգևոր կյանքի մեջ, որ փորձի եկեղեցում «իշխանափոխություն» անել, օրինակ  գահընկեց անել Վեհափառ Հայրապետին, փոխարինել նրան՝ Արշակ եպիսկոպոս Խաչատրյանը պատասխանեց. «Օրենսդրությունն իրենց նման հնարավորություն, իրավասություն վերապահո՞ւմ է։ Պետք է փորձել ջանքեր գործադրել օրենսդրության պահպանման համար»։

Լրագրողի դիտարկմանը, թե Փաշինյանն արդեն գոտկատեղից ներքև հարվածներ է հասցնում, եկեղեցին ավելի բարձրի՞ց է հարվածելու, թե՞ պաշտպանվելու է,  Արշակ եպիսկոպոս Խաչատրյանը պատասխանեց. «Երբ որ անելիքներ լինեն, մենք այդ մասին հարմար նկատելու դեպքում, կբարձրաձայնենք»:

Հարցին, թե կա՞ն կուսակրոն քահանաներ, որ խախտել են կուսակրոնության ուխտը, նա պատասխանմեց. «Ես այդ հարցը կոռեկտ հարց չեմ ընդունում: Կասկածի որդ կա, ընդհանուր կասկած կա, որ նաև ամուսնացած անձինք իրենց ամուսնական ուխտին հավատարիմ չեն: Հիմա ես չգիտեմ` ձեզանից որևէ մեկը ամուսնացա՞ծ է, թե՞ ամուսնացած չէ: Բայց որքա՞ն կոռեկտ է այդ հարցը, նույն տիպի հարց ես ձևակերպեմ որևէ մեկին տամ: Դա ճիշտ հարցադրում չէ»: