Սուրբ Զատիկն ու հավկիթի գնային վերելքը

Մի քանի օրից Հայ առաքելական եկեղեցին տոնելու է սբ Զատիկը, որի գլխավոր խորհրդանիշներից է ներկված ձուն: Սովորաբար այս օրերին ավելանում է ոչ միայն ձվի սպառման ծավալները, այլև` գինը:

Թե ինչպիսին է իրավիճակը տոնից հաշված օրեր առաջ, newspress.am-ը փորձեց պարզել հարցախույզի միջոցով:

Երևանյան խանութներից մեկում 0.2 չափսի ձվի գինը 65 դրամ էր: Մինչդեռ երեկվա դրությամբ, նույն ձուն արժեր 60 դրամ:

Իրացման կետի աշխատակցուհին մեզ հետ զրույցում նկատեց, որ այսօր երեկոյան սպասում են ձվի խմբաքանակ, սակայն ավելի թանկ կմատակարարեն, թե ոչ դեռևս չգիտի: Նաև չցանկացավ խոստովանել, որ այդ պահին էլ արդեն ձուն թանկ են վաճառում:

Ավելին` մեզ հետ շփվող վաճառողուհու զրույցը մյուս աշխատակցուհուն դուր չեկավ և նա խիստ տոնով հորդորեց, որ որևէ հարցի չպատասխանի:

Երևանի մեկ այլ խանութում էլ 0.2 չափսի ձուն արդեն արժեր 70 դրամ: Աշխատակցուհին մեզ հետ զրույցում նկատեց. «Դե Զատիկ է գինը բարձրացել է»,-ասաց վաճառողուհին` չպատասխանելով հարցին, թե ինչ գնով են ստացել ձուն:

Սա այն դեպում, երբ Հայաստանի թռչնաբույծների միության նախագահ Սերգեյ Ստեփանյանը հայտնել էր, որ Սուրբ Զատիկին ընդառաջ՝ Հայաստանի խանութներում և սուպերմարկետներում ձուն չի թանկանա: Թռչնաբույծները վերջին մի քանի ամիսների մեծ քանակությամբ հավկիթ են կուտակել, որպեսզի հանրապետության իրացման կետերում Սբ Զատիկի տոնին դեֆիցիտ չլինի:

Նշենք նաև, որ Զատիկին տոնին 25 հատիկ ձու ավելի է օգտագործում հայ սպառողը և 10-15 տոկոսով ավելանում է ձվի սպառման ծավալները, իսկ սովորաբար Հայաստանում ձվի սպառման տարեկան ծավալը կազմում է 700 մլն ձու: