Մասիսում ավտովթար է եղել. վարորդը և ուղևորները մահացել են

Հայաստանի ԱԻՆ-ում, այսօր՝ մարտի 23-ին, ժամը 04.56-ին տեղեկություն է ստացվել, որ Մասիս-Էջմիածին ավտոճանապարհին՝ Սայաթ-Նովա գյուղի մոտակայքում, տեղի է ունեցել ավտովթար, կա տուժած. անհրաժեշտ է փրկարարների օգնությունը:
Դեպքի վայր է մեկնել մեկ մարտական հաշվարկ:

Պարզվել է, որ Հ-13 ավտոճանապարհի Մասիս-Էջմիածին հատվածի 4-րդ կմ-ին՝ Նիզամի եւ Սայաթ-Նովա գյուղերի խաչմերուկում, դեռեւս չբացահայտված հանգամանքներում «Օպել Աստրա» մակնիշի 34 SF 796 համարանիշի ավտոմեքենան դուրս է եկել ճանապարհի երթեւեկելի հատվածից եւ բախվել գազատար խողովակին. վերջինից տեղի է ունեցել արտահոսք:

Ավտոմեքենայի վարորդը՝ 19-ամյա Արսեն Հոսեփյանը, եւ ուղեւոր՝ 23-ամյա Ս. Բ.-ն տեղում մահացել են:

Մինչ հրշեջ-փրկարարների կանչի վայր հասնելը՝ ուղեւոր՝ 21-ամյա Լևոն Հովսեփյանը տարբեր աստիճանի մարմնական վնասվածքներով հոսպիտալացվել է «Էրեբունի» ԲԿ, որտեղ նրա առողջական վիճակը գնահատել են ծայրահեղ ծանր:

Քիչ առաջ ստացված տեղեկությունների համաձայն էլ` պարզ դարձավ, որ երիտասարդը մահացել է:

Նկատենք, որ Արսեն ու Լևոն Հոսեփյանները եղբայրներ են։

Վթարից տուժած երեք երիտասարդներն էլ Արարատի մարզի Արբաթ գյուղի բնակիչներ էին: