Անսուրբ եք... լավ հոգեհանգիստ լինի՝ կարելի է համալիրում անել, բայց հարսանիք՝ ո՞չ. խելագարվել կարելի է ուղղակի. Փաշինյան

Ինչքա՞ն կարելի է այսքան կեղծ լինել, ինչքա՞ն կարելի է այդքան խոսել սրբության մասին ու այդքան արտասուրբ լինել, ինչքա՞ն կարելի է ոտքի տակ տալ սրբությունները ու մեկ էլ՝ «վա՜յ, համալիրում բան ա եղել...»: Այս  մասին կառավարության նիստի ժամանակ հայտարարեց Նիկոլ Փաշինյանը՝ անդրադառնալով Կարեն Դեմիրճյանի անվան մարզահամալիրում տեղի ունեցած աղմկահարույց միջոցառմանը՝ հանրությանը հայտնի «Վիվարոյի Վիգեն»-ի եղբորորդու հարսանիքին։

«Եթե հիմա ասեն, որ պետք է համալիրի վրա խաչ դնեն՝ մեծ ակտիվություն կառաջանա։ Կասեն՝ ինչպիսի՜ նվիրական առաջարկություն, իսկապե՜ս, եկեք տանենք, խաչ դնենք համալիրի գլխին։ Այ, որ լավ հոգեհանգիստ լինի, կարելի է անել, բայց հարսանիք թող գնան Դուբայում անեն, սա հարսանիք անելու ի՞նչ տեղ է, Հայաստանը ձեզ համար հարսանիք անելու տե՞ղ է... խելագարվել կարելի է ուղղակի»,- ասաց Փաշինյանը։

Ըստ նրա՝ համալիրը տարիներով քանդվում էր, քայքայվում էր ու հիմա միլիարդներ են ներդնում, դեռ չեն կարողանում քայքայման պրոսեցը կանգնեցնել։

«Բա պետք է տնտեսվարությամբ զբաղվի, մարզահամերգային համալիրում ի՞նչ պետք է տեղի ունենա... հարյուրավոր ընտանիքներ գնում, Դուբայում հարսանիք են անում, հետ են գալիս, իսկ որ այստեղ կարող է սննդի համակարգ աշխատել, երաժիշտները կարող են հավելյալ գումար ստանալ... չէ, եկեք ձեռք չտանք, չմոտենանք համալիրին»,- կառավարության նիստում ասաց նա։