Ընտրութուններին ընդառաջ Փաշինյանը երեք ապրանք է ցանկանում վաճառել ժողովրդին. Քաղաքագետ

«Իշխանությունը խորհրդարանական ընտրություններին ընդառաջ ունի երեք ապրանք, որ ցանկանում է վաճառել ժողովրդի վրա»,-լրագրողների հետ հանդիպմանն ասաց քաղաքագետ Սուրեն սուրենյանցը։

Նա թվարկեց, առաջինը թալանի վերադարձն է, իսկ ընդդիմության անելիքը պետք է լինի ապացուցել, որ Փաշինյանն ու կոռուպցիան, թալանը հոմանիշներ են։

«Դրա համար պարարտ հող կա, ԱՆԻՖ-ի ու մի քանի այլ պատմություններ հենց դրա մասին են։ Պատահական չէ, որ պատգամավոր Աննա Գրիգորյանի այդ հարցից հետո Նիկոլ Փաշինյանն ընկավ ցնցումների մեջ»,-ասաց բանախոսը։

Երկրորդ ապրանքը, որ ցանկանում է վաճառել Փաշինյանը, ըստ Սուրենյանցի, խաղաղության գաղափարն է։

«Ընդդիմությունն այս հարցում թերացել է, քանի որ փողոցային բոլոր շարժումների հիմքում եղել են գրավիչ, բայց ոչ իրատեսական կարգախոսներ։ Շատ կարևոր է՝ ապացուցվի, որ Փաշինյանն ամենևին էլ խաղաղության մունետիկ չէ, այլ ճիշտ հակառակը՝  պատերազմի հրձիգ է, ես կարող եմ ժամերով դա հիմնավորել»,-ասաց նա։

Հաջորդը ապրանքը ԵՄ անդամակցությունն է, եվրոինտեգրման կեղծ թեզը։

«Արարատ Միրզոյանի մակարդակով հայտարարվեց, որ սա բլեֆ է, հիշում եք, Սերգեյ Լավրովի հետ ասուլիսում հնչեցրած հայտարարությունները»,-ասաց քաղաքագետը։

Խոսելով իշխանափոխության բաց թողնված հնարավարության մասին՝ Սուրենյանցն ասաց, 2021-ին դա չի հաջողվել երկու պատճառով՝ օբյեկտիվ (հետպատերազմական ֆոբիաներ) ու սուբյեկտիվ (ընդդիմության անընդունակություն)։ Սովորաբար հետպատերազմական երկրներում մարդիկ վախենում են ցնցումներից՝ կարծելով, որ դա կբերի նոր հարձակումների, պատերազմի։

Ինչ վերաբերում է իշխանափոխության առկա հնարավորություններին ու տարբերակներին, ապա բանախոսի գնահատմամբ, դրանցից մեկը՝ իմպիչմենթը հիմա գործարկվում է, սակայն ինքը դրա իրականացման հնարավորություն գրեթե չի տեսնում։

Արտահերթ ընտրությունների պահանջը բաց է թողնվել։

«Եթե Սրբազան շարժման սլաքներն ու ակցենտները ճիշտ դրվեին, մենք անցած տարի կարող էինք ունենալ նման հնարավորություն։ Հաջորդը հերթական ընտրություններն են։ Ես բացարձակապես այն կարծիքին չեմ, որ ընտրություններով հնարավոր չէ իշխանություն փոխել, միանգամայն հնարավոր է։ Պնդում եմ, որ պոպուլիստական իշխանությունների համար աքիլեսյան գարշապարը հենց ընտրություններն են։ Ընտրությունները Նկոլ Փաշինյանի համար ամենախոցելի միջավայրն են, դրանք ընդդիմությանն ու նոր ուժերին դրսևորվելու բացառիկ հնարավորություն են տալիս։ 2026-ին ես շատ փոքր եմ համարում իշխանության վերարտադրման հնարավորությունը»,-ասաց բանախոսը։