Սամվել Ալեքսանյանը ՍԱՊԾ-ին օգտագործում է դեղերի շուկայում մենաշնորհ ունենալու համար

ՀՀ ԳՆ սննդամթերքի անվտանգության պետական ծառայության պետի հրամանով՝ դիտարկում է իրականացվել «Ալֆա Ֆարմ» ՓԲԸ-ում. արգելել է «Սեալեքս ֆորտե» և «Ալիկապս» կենսաբանական ակտիվ հավելումների իրացումը: Այս մասին տեղեկացնում են ՍԱՊԾ-ից:

Նշենք, որ ըստ որոշ լուրերի, «Ալֆա ֆարմը» պատկանում է ԱԱԾ նախկին պետ Գորիկ Հակոբյանին: Ինչո՞ւ այս պահին և միայն «Ալֆա ֆարմը» ՍԱՊԾ պետը հրամայեց ստուգել:

Հաղորդագրության մեջ չի նշվում, որ բողոք կա, կամ ինչ-որ հիմք դիտարկման համար, պարզապես ՍԱՊԾ պետ Արմեն Հայրապետյանը հրաման է տվել: Այս կարգի հրամաններ կատարվում են միայն որոշ դեպքերում, եթե ՍԱՊԾ-ին ուղղորդում են դեպի տվյալ կազմակերպությունը՝ կարճ ասած օգտագործում են պետական լծակները մրցակցին դաշտից դուրս մղելու համար:

Չի բացառվում, որ աչք են դրել «Ալֆա ֆարմ» դեղատների ցանցի վրա: Հիշեցնենք, որ Սամվել Ալեքսանյանը դեռևս երկու տարի առաջ փորձում էր ինչ-որ ձևով կասեցնել տալ «Ալֆա ֆարմի» գործունեությունը, կամ էլ կուլ տալ այն և վերջնականապես գերիշող դիրք ունենալ դեղերի շուկայում, որպեսզի այդ ոլորտում ունենա մենաշնորհային կարգավիճակ:

Բայց, քանի որ, ըստ որոշ տեղեկությունների, «Ալֆա ֆարմում» ներդրումներ ունի Վերակառուցման և զարգացման եվրոպական բանկը, ապա այս ընկերությանը կուլ տալ չի հաջողվել: Ինչպես երևում է Սամվել Ալեքսանյանը խնդիրը կրկին փորձում է լուծել, սակայն այս անգամ օգտագործելով ՍԱՊԾ-ն:

Արդյոք ՍԱՊԾ-ն դաշտում այլ խնդիրներ չունի լուծելու, իհրակե ունի. ժամկետանց սննդի վաճառքից մինչև սնունդ արտադրող ընկերությունների սանիտարահիգիենիկ ոչ բավարար պայմանները, և եթե հարցնելու լինեք ՍԱՊԾ-ից ինչու չեն ստուգում, պատասխանում են, որ ահազանգ չկա:

Վերահսկելու փոխարեն սննդի շուկան, ՍԱՊԾ-ն իր ծանր տեղը թեթևացրել է ու գնացել ստուգելու «Ալֆա ֆարմի» կենսաբանական հավելումները, այսինքն ջուրը ջրաղացը տարել է, ՍԱՊԾ-ն ընկել է Չարչախին է ման գալիս:

Ավելի քան պարզ է, որ գործ ունենք պատվերի հետ, որն էլ իր հերթին նշանակում է, որ յուրաքանչյուր օլիգարխ կամ պատգամավոր կարող է պետական կառույցի միջոցով լուծել այն խնդիրը՝ կարգով, օրենքով, ինչն անհնար է լուծել բիզնես-մեքենայությունների միջոցով: Այս խնդրի հետ կապված հարցը ոչ թե հաղթողների կամ պարտվողների մասին է, այլ այն, թե ինչպիսին է Հայաստանում բիզնես միջավայրը:

Հիշեցնենք նաև, որ հաճախ է գրվում, որ «Նատալի Ֆարմը» ներկրում է ժամկետանց դեղորայք և կենսաբանական հավելումներ, սակայն չգիտես ինչու Սամվել Ալեքսանյանի կազմակերպությանը որևէ կառույց չի ստուգում: Մնում է սպասել ու տեսնել, թե ինչ է ստացվում Սամվել Ալեքսանյան, ՍԱՊԾ և «Ալֆա ֆարմ» եռանկյունուց: