Սուրիկ Խաչատրյանը երկու մարզում կվերահսկի ընտրակեղծիքները

«Մարզերի խոշորացումը բացառապես մի նպատակ ունի՝ ավելի հեշտ անցկացնել կեղծիքները և ռեսուրսներն ավելի արդյունավետ օգտագործել»,- newspress.am-ի հետ զրույցում ասաց ԱԺ «Ժառանգություն» խմբակցության ղեկավար Արմեն Մարտիրոսյանը՝ անդրադառնալով Վայոց Ձորի ու Սյունիքի մարզերի միավորմանը:

Հիշեցնենք, որ ըստ Ընտրական օրենսգրքի նախագծի՝ 41 ընտրատարածքների փոխարեն այժմ լինելու են 13 ընտրական տարածքներ՝ 4-ը Երևանում, 9-ը մարզերում:

Մարզերից միանում են միայն երկուսը Վայոց Ձորն ու Սյունիքը՝ դառնալով մեկ ընտրատարածք, որտեղ վերահսկողությունն իրականացնելու է Սյունիքի «հեղինակություն վայելող» մարզպետ՝ Սուրիկ Խաչատրյանը (Լիսկան):

Արմեն Մարտիրոսյանը նկատեց, որ Վայոց Ձորի բնակչության թիվը փոքր է, իսկ քանի որ Սյունիքի մարզպետը «հրաշալի» է կառավարում մարզը՝ նրան են հանձնել երկու մարզերի վերահսկողություը:

«Միացրել են այդ մարզին, որպեսզի Վայոձ Ձորում էլ վերահսկողությունը այդ ձևով մեծացնեն»,-ասաց պատգամավորը:

Նրա խոսքով պատկերը նույնն է նաև Երևանում միավորված վարչական շրջանների մասով:

Հիշեցնենք, որ մայրաքաղաքի տարածքում կազմավորվում է 4 ընտրական տարածք:

Միանում են Ավան, Նոր-Նորք, Նորք-Մարաշ, Քանաքեռ-Զեյթուն վարչական շրջանները, որի վերահսկողությունը տրվելու է Ռուբեն Հայրապետյանին (Ծաղիկ Ռուբոյին): Մալաթիա-Սեբաստիա, Շենգավիթ վարչական շրջանների ընդհանուր վերահսկողությունը կհանձնվի Սամվել Ալեքսանյանին (Լֆիկին), իսկ Կենտրոն, Էրեբունի, Նուբարաշեն վարչական շրջանների վերահսկողությունը կապահովի Մհեր Սեդրակյանը (Թոխմախի Մհերը): Միանում են նաև Արաբկիր, Աջափնյակ, Դավթաշեն վարչական շրջանները:

Ինչ վերաբերում է ԸՕ-ի մյուս փոփոխություններին, ապա Արմեն Մարտիրոսյանը կրկնեց այն տեսակետը, ըստ որի իշխանությունը ցանկացել է որոշ կետերով աչք փակել ավելի կարևոր կետերի վրա:

Իսկ այն, որ ընդդիմության որոշ առաջարկներ իշխանության կողմից ընդունվում են, ընդդիմադիր խմբակցության պատգամավորը նկատում է, եթե ամբողջ փաթեթը չեն ընդունում նշանակում է ընտրակեղծարարության ճանապարը նորից բաց է մնում:

«Որոշ առաջարկներ ընդունելը որևէ խնդիր չի լուծի, պետք է ամբողջական փաթեթային ձևով լուծում տրվի, որպեսզի սողանքները փակվեն, հառակ պարագայում, մի քանիսն ընդունելով՝ մյուսները մատնելու են նորից անուշադրության, և թվանկարչությունն ու ընտրակեղծարարությունը մնալու են ուժի մեջ»,-նշեց Արմեն Մատինյանը: