Ոչ միայն Ադրբեջանում՝ Մոզամբիկում էլ են օգտագործվում ռուսական զենք. ՀՀ-ն ինքը պետք է որոշի, թե որտեղից զենք գնի. Լավրով (տեսանյութ)

ՌԴ արտաքին գործերի նախարար Սերգեյ Լավրովը և ՀՀ արտգործնախարար Արարատ Միրզոյանն այսօր քննարկել են այն հարցը, որ ՀՀ-ն վճարել է զենքի համար, սակայն չի ստացել այն։

Այս մասին արտգործնախարարների ասուլիսի ժամանակ հայտարարեց Լավրովը՝ արձագանքելով լրագրողի հարցին։

«Մենք այդ դրվագն այսօր քննարկել ենք, կարգավորել ենք այդ հարցը, այդ վճարումները փոխանցվել են այլ նպատակների, այստեղ հակասություն չկա: Նոր մատակարարումների մասով  ունենք մի իրավիճակ, երբ ստիպված ենք, ինչպես պատմության ընթացքում բազմիցս,  կռվել ամբողջ Եվրոպայի դեմ, որը հերթական անգամ նացիստական կարգախոսների ներքո Զելենսկու ռեժիմն առաջ մղելով կռվում է մեր դեմ: Գործնականում բոլոր եվրոպական երկրներն ունեն զենք, որոնք ժամանակակից են, հասնում են Ուկրաինա և այդ զենքը մեր պատասխանն է պահանջում: Մեր հայ գործընկերները, հուսով ենք, հասկանում են, որ այդ իրավիճակում մենք չենք կարող մեր բոլոր պարտավորությունները ժամանակին կատարել: Բայց նույնիսկ այդ իրավիճակում նախատեսված բոլոր զենքերը փոխանցվում են, և մենք  կշարունակենք դա անել»,- ասաց Լավրովը:

Նա նաև ավելացրեց՝ որևէ խնդիր չի տեսնում, որ ՀՀ-ն զենք գնի այլ երկրներից։

«Դա մեր հայ բարեկամների ընտրությունն է: Եթե իրենք ցանկանում են ունենալ ֆրանսիական բազա՝ խնդրեմ, եթե այլ երկրի՝ խնդրեմ: Մենք որևէ բան չենք պարտադրելու: Բայց, իհարկե, երբ դաշնակիցը հիմնվում է ֆրանսիական մատակարարումների վրա, որը գլխավորում է ՌԴ-ի դեմ թշնամական ճամբարը, պարզապես  ատելություն են շնչում ՌԴ-ի նկատմամբ... մեր գործընկերները պետք է որոշեն, թե որտեղից զենք գնեն»,-ասավ Լավրովը։

Ինչ վերաբերում է այլ երկրների՝ մասնավորապես ՀՀ թշնամի Ադրբեջանին զենք վաճառելուն, ապա Լավրովի դիտարկմամբ՝ երկիրն է որոշում որտեղից զենք գնի և ռուսական զենք ամեն տեղ կարելի է տեսնել։

«Ոչ միայն Ադրբեջանում՝ Աֆրիկայում, Մոզամբիկում էլ է օգտագործվում ռուսական զենք»,-ասաց նա։