Թուրքիայի քաղաքացիներն շտապում են Հայաստանում կացության կարգավիճակ ստանալ. վերջին 6 տարվա թվային տվյալները (լուսանկարներ)

NEWSPRESS.am-ին տրամադրել են թուրքական անձնագրերի լուսանկարներ և հայտնել, որ իրենց հաջողվել է դրանք լուսանկարել՝ անձնագրի թարգմանության համար համապատասխան կառույց գնացած ժամանակ:

Լուսանկարները մեզ փոխանցած քաղաքացին նշեց, որ Թուրքիայի քաղաքացիների անձնագրերը թարգմանվում են՝ Հայաստանում ժամանակավոր կամ մշտական կացություն ստանալու նպատակով:

«Ես նաև հասցրեցի բացել անձնագիրը. հիմնականում երիտասարդներ էին՝ լուրջ դեմքով, չեմ կարծում, թե պատահական մարդիկ են»,- ասաց մեր զրուցակիցը: 

NEWSPRESS.am-ը  փորձեց հետաքրքրվել Ներքին գործերի նախարարությունից, թե 2018 թվականից մինչև 2025թ. Թուրքիայի քանի՞ քաղաքացի է դիմել ՀՀ ժամանակավոր և մշտական կացության կարգավիճակ ստանալու համար:

Մեր հարցմանն ի պատասխան ՀՀ ՆԳՆ միգրացիայի և քաղաքացիության ծառայությունից ներկայացրել են ժամանակավոր և  մշտական կացության կարգավիճակ ստացած` Թուրքիայի Հանրապետության քաղաքացիների վերաբերյալ վիճակագրություն։

Ներկայացնում ենք վիճակագրական տվյալները՝ ըստ տարեթվերի.

2018թ․ ժամանակավոր՝ 19, մշտական՝ 8,

2019թ․ ժամանակավոր՝ 16, մշտական՝ 4,

2020թ․ ժամանակավոր՝ 19, մշտական՝ 5,

2021թ․ ժամանակավոր՝  8, մշտական՝ 2,

2022թ․ ժամանակավոր՝ 29, մշտական՝ 6,

2023թ․ ժամանակավոր՝ 34, մշտական՝ 8,

2024թ․ ժամանակավոր՝ 24, մշտական՝ 6

Ստացվում է՝ 6 տարում ժամանակավոր կացության կարգավիճակ է ստացել Թուրքիայի 149, իսկ մշտական՝ մշտական-39: 

Հարկ է նկատել, որ օրենքով սահմանված կարգով, օրենսգրքի համապատասխան  կետով՝ Մշտական կացության կարգավիճակը տրվում է օտարերկրացուն, եթե նա`

- ապացուցում է Հայաստանում ՀՀ քաղաքացի հանդիսացող կամ հատուկ կացության կարգավիճակ ունեցող ամուսնու կամ մերձավոր ազգականների (ծնող, զավակ, եղբայր, քույր, տատ, պապ, թոռ) առկայությունը, ՀՀ-ում ապահովված է բնակարանով ու գոյության միջոցներով և մինչև մշտական կացության կարգավիճակ ստանալու համար դիմում ներկայացնելն օրենքով սահմանված կարգով առնվազն երեք տարի բնակվել է ՀՀ-ում,

- ՀՀ-ում ձեռնարկատիրական գործունեությամբ զբաղվելը,

- ազգությամբ հայ լինելը։ 

Թերևս, հաշվի առնելով վերոհիշյալ հանգամանքը, ՆԳՆ-ից մեզ ուղարկված պատասխանում ընդգծված էր նաև, որ բոլոր դիմումատուներն ազգությամբ հայեր են:

Հարկ է նկատել, որ թեև հարցման մեջ խնդրել էինք տրամադրել նաև 2025թ-ի տվյալները (գոնե առաջին  եռամսյակի), սակայն, այդ ժամանաշրջանի մասով, ՆԳՆ-ից տվյալներ չեն տվել, ինչը թույլ է տալիս ենթադրել, որ նախորդ տարիների` գոնե նույն ժամանակահատվածի համեմատ, կացության կարգավիճակ ստանալու համար դիմող քաղաքացիների թիվն աճել է:

Հատկապես որ, անձնագրերի  լուսանկարները մեզ ուղարկող քաղաքացին, թարգմանող ընկերության աշխատակցից ճշտել է նաև, որ միայն մեկ օրվա հաշվարկով, թարգմանվում է մոտ 15 անձնագիր (սա միայն մի նոտարական կառույցում):

Ամեն դեպքում, ինչպիսին էլ լինեն հաշվարկները, պետք է արձանագրել, որ Հայաստանում կացության կարգավիճակ ստանալու ցանկությունը Թուրքիայի քաղաքացիների շրջանում մեծացել է:

Արմինե Մկրտումյան