SOS Գյումրի նախաձեռնությունը աճուրդի է հանել Ջորկաեֆի գնդակը

SOS Գյումրի նախաձեռնությունը աճուրդի է հանել առաջին լոտը, որի վաճառքից ստացված գումարն օգտագործվելու է Գյումրիի անօթեւան 13 ընտանիքների համար բնակարան ձեռք բերելու նպատակով: Աճուրդի առաջին փուլն անցկացվելու է առցանց՝ Ֆեյսբուք սոցիալական ցանցի միջոցով:

Առաջին լոտը ֆրանսահայ հայտնի ֆուտբոլիստ Յուրի Ջորկաեֆի գնդակն է, որի մեկնարկային գինը՝ 35․000 դրամ է։

Լոտը կվաճառվի վերջին նշված գնից 48 ժամ հետո»,-գրված է SOS Գյումրիի ֆեյսբուքի էջում:

Բացի այս գնդակից՝ աճուրդի են հանվելու Յուրա Մովսիսյանի մարզաշապիկը, Հենրիխ Մխիթարյանի մարզաշապիկը՝ իր ստորագրությամբ, ինչպես նաեւ նույն Մխիթարյանի ու «Արարատ-73»-ի ֆուտբոլիստներ Խորեն Հովհաննիսյանի ու Սերգեյ Բոնդարենկոյի ստորագրությամբ գնդակներ, Ռուդ վան Նիստելրոյի, Կլարենս Զեեդորֆի, Ջենարո Գատուզոյի մակագրությամբ իրենց լուսանկարները, «Բարսելոնայի» դրոշը, որի վրա 2009 թվականին ստորագրել են Լիոնել Մեսսին, Թիերի Անրին, Չավին, Անդրես Ինյեստան, Պույոլը եւ թիմի գլխավոր մարզիչ Պեպ Գվարդիոլան, «Ռեալ Մադրիդի» մարզաշապիկը, որի վրա վերջերս ստորագրել են թիմի առաջատարները: Մարզաշապիկը շուտով կլինի Հայաստանում:

Աճուրդին միացել են նաեւ «Փյունիկ» ակումբի գործադիր տնօրեն Վարդան Մինասյանը, օլիմպիական չեմպիոն, Հայաստանի հունահռոմեական ոճի ըմբշամարտի հավաքականի գլխավոր մարզիչ Լեւոն Ջուլֆալակյանն ու Օլիմպիական խաղերի արծաթե մեդալակիր, աշխարհի չեմպիոն Արսեն Ջուլֆալակյանը:

Այս իրերի մի մասը նախաձեռնությանն աջակցելու համար նվիրել են հենց մարզիկներն ու մարզիչները, մի մասն էլ՝ երկրպագուները: