Փաշինյանի ճղճղոցը անհետևանք չի մնա ՔՊ-ականների համար. «Հրապարակ»

«Հրապարակ»-ը գրել է.

Նիկոլ Փաշինյանի՝ ԱԺ-ում դրսեւորած անհավասարակշիռ վարքից հետո կոռուպցիոն սկանդալներում հայտնված ՔՊ-ականները շունչները պահած սպասում են՝ համոզված, որ Փաշինյանի այդքան քննադատված վարքն անհետեւանք չի մնալու նաեւ իրենց համար։ Նրանցից մեկը մեզ ասաց, որ Փաշինյանին լավ ճանաչելով, գրեթե կասկած չունի, որ նրա այդ պահվածքը նախեւառաջ թիմակիցներին էր ուղղված, որ, տեսեք, ձեր պատճառով եւ թուքումուր եմ ուտում, հետեւաբար՝ պետք է պատասխանատվության ենթարկվեք, խոսքը Տիգրան Ավինյանի, Փամբուխչյանի եւ այլոց մասին է։

Մեզ ասացին, որ Փաշինյանի պահվածքի հասցեատերը նաեւ Արամ Սարգսյանն է, քանի որ Փաշինյանին հունից հանող հարցաշարում նաեւ Նոր Նորքի թաղապետի հետ կապված աղմկոտ պատմությունն էր եւ քաղաքական պատասխանատվության բացակայությունը։

Ավելին, ՔՊ-ում կարծում են, որ խմբակային ծեծին մասնակցած թաղապետ Տիգրան Տեր-Մարգարյանի պաշտոնավարման օրերը նույնպես հաշված են, եւ դա կարող է տեղի ունենալ որպես իրավական գործընթացների հետեւանք, հայտնի է, որ քրեական վարույթ է նախաձեռնվել։ Ի դեպ, թաղապետարանի աշխատակիցների շրջանում սուգ է, հույս ունեին, որ կազատվեին թաղապետից, որը հատկապես կին աշխատակիցների նկատմամբ հաճախ ոչ հարգալից վարք է դրսեւորում։