«Կարլ Մարքս․ խոստովանություններ» ներկայացումը բացահայտեց 19-րդ դարի փիլիսոփայի կյանքի թաքուն էջերը. ՀԵՆՔ-ը մասնակցել է առաջնախաղին (լուսանկարներ)

ՀԵՆՔ համազգային բարեգործական հիմնադրամի դասախոսներն ու ուսանողները՝ ղեկավար կազմի մասնակցությամբ, ներկա են գտնվել «Կարլ Մարքս․ խոստովանություններ» ներկայացման առաջնախաղին: Բեմականացումը կենսագրական տրագիկոմեդիա է, որը բացահայտում  է 19-րդ դարի փիլիսոփայի կյանքի թաքուն էջերը:

Բեմադրությունը տեղի ունեցավ Գաբրիել Սունդուկյանի անվան ազգային ակադեմիական թատրոնում: Ներկայացման մեջ բացակայում է գեղարվեստական հորինվածքը. այնտեղ միայն ներկայացվում է մարդկային իրական կյանքը, որն արտացոլված է փաստաթղթերում։

 «Կարլ Մարքս․ խոստովանություններ» ներկայացման առանցքում 19-րդ դարի երկու մտածողներ Կարլ Մարքսի և Ֆրիդրիխ Էնգելսի նամակներն են։ Մարքսի՝ հասարակության լայն շրջանակի սուր աչքից վրիպած անձնական կյանքի պատկերն ավելի ամբողջացնելու համար ընդգրկվել են նաև փիլիսոփայի ընտանիքի անդամների նամակները։

Նամակներում ոչ թե Կարլ Մարքս հասարակական գործիչն է, այլ հասարակ մարդը, որը բախվել է դաժան իրականությանը, աղքատությանն ու աշխարհին հարմարվելու անկարողությանը։  Առանձնացվել էր Մարքսի և Էնգելսի այն նամակները, որոնցում նրանք բողոքում են առողջությունից, ֆինանսական վիճակից և այլն։

Պիեսի և բեմադրության հեղինակ՝ Հայկ Կարապետյան /Լատվիա/, բեմականացրել է Այնարս Կամոլինշի «Բողոքներ» ռադիոներկայացման հիման վրա:
Բեմանկարչությունը՝ Ա․Ջ․ Վայսբարդի /ԱՄՆ/
Բեմազգեստը՝ Մերի Սարգսյանի
Երաժշտությունը՝ Ուիլյամ Բասինսկիի
Յ․ Ս․ Բախի երաժշտությունը՝ Հայկ Մելիքյանի կատարմամբ
Նամակների թարգմանությունը՝ Զավեն Բոյաջյանի

Դերերում՝  խաղում են Արմեն Քուշկյանը, Արաքսյա Մելիքյանը, Ռուզաննա Հախնազարյանը, Հայկ Իսրաելյանը, Սաթենիկ Գասպարյանը և Ջուլիա Մովսեսյանը:

ՀԵՂ. Արմինե Մկրտումյան