Անտառատնտեսությունում կադրերը պակասում են, ապօրինությունները՝ ավելանում

Անտառը մարդու կարիք ունի: Newspress.am-ի հետ զրույցում ասաց փորձագետ, ագրո-էկոլոգ Գալուստ Նանյանը՝ անդրադառնալով անտառների պաշտպանության խնդրին:

Նա նկատեց, որ եթե տարիներ առաջ անտառատնտեսություններում, մասնագետների բացակայության պատճառով, կադրերի խնդիր կար, ապա այսօր այս խնդիրը այլ տեսանկյունից է դիտարկվում.

«Օրինակ Թուրքիայում, եթե ինչ-որ մեկը ցանկանա աշխատել անտառային ոլորտում, նրանից կպահանջեն բարձրագույն կրթություն, Վրաստանում բարձրագույնը՝ կարևոր չէ, իսկ Հայաստանում բարձագույն կրթություն ստանալու խնդիր չկա: Խնդիրն այն է, որ այս ոլորտը չի հետաքրքրում մասնագետներին, քանի որ աշխատավարձը ցածր է»,-ասաց Գալուստ Նանյանը:

Կադրերը պակասում են, իսկ ծառահատումներն ավելանում:

Փորձագետի խոսքով ոլորտում առկա է նաև ապօրինի ծառահատման խնդիրը: Գալուստ Նանյանը նկատում է, որ բնակչության զգալի մասը անտառը դիտարկում է որպես ապրուստի միջոց` վայր, որտեղից վառելափայտ և սնունդ է հայթայթում:
Փորձագետի տեղեկացմամբ, ընդհանուր առմամբ, համաշխարհային վիճակագրության համաձայն՝ մարդու կողմից ու նրա միջամտությամբ, ամեն տարի 15-16 մլն հա բնական անտառ է անհետանում երկրագնդի վրա: Հայաստանը աշխարհի այն 70 երկրներից է, որտեղ անտառածածկ տարածքը կազմում է ընդհանուր մակերեսի 10 տոկոսը:

Վերջին շրջանում գազի և լույսի գնի հետ պայմանավորված՝ 2014թ-ի համեմատ էլ, 2015-ին Հայաստանում ավելացել են ապօրինի ծառահատումները:

«Հատկապես անտառներին մոտ գտնվողները հաճախ են վառելիքի ձեռքբերման համար մտնում անտառ»,-ասում է փորձագետը՝ չբացառելով իհարկե կոռուպցիայի գործոնը:

Նրա գնահատմամբ՝ բնությունը պետք է օգտագործել ճիշտ ու խելամտորեն: Հակառակ դեպքում՝ ինքն իրեն կօգտագործի: