Միհրան Պողոսյանը իր նշաձողը բանանի մակարդակից իջեցրեց «գարշոկի» մակարդակի

Բոլորովին վերջերս համացանցում տարածվեցին զավեշտալի կադրեր, թե ինչպես է ՄիհրանՊողոսյանի` Քեթրին Միհրանի ղեկավարած կառույցը աճուրդի դրել մանկական զուգարանակոնքեր՝ գարշոկներ: Ժամանակին, երբ Հայաստան բերվեցին մեկը տասի գնով բիոզուգարաներ, որոնք հետո չաշխատեցին, հարկատուների բողոքը բիոզուգարանների հետ կապված մնաց անպատասխան, քանի որ շարքային հարկատուի ձեռքին ոչ ԴԱՀԿ-ի մեխն էր, ոչ էլ չագուչը, որը չի խնայում անգամ մանկական զուգարանակոնքը:

ԴԱՀԿ-ն որևէ մեկնաբանություն չտվեց: Այսինքն, ունենք ԴԱՀԿ կառույց, որը կամ կալանքի տակ է պահում մարդկանց հաշիվները, կամ աճուրդով վաճառում մարդկանց բնակարանները,կամ էլ կոպեկների դիմաց խլում երեխաների գարշոկները ու նորից աճուրդի հանում: Իսկ ԴԱՀԿ աճուրդների մասին շատ է գրվել, թե իրականում ինչ խարդախություններ են թաքնված այդ աճուրդների հետևում: Այստեղ խնդիրը այլ է՝ ապահով Հայաստանի ներսում անգամ երեխաներն են զրկվում իրենց գարշոկներից, իսկ մենք ձեռքներս պարզած սփյուռքին սրտացավ տիրոջ կերպարի մեջ ենք մտնում:

Մամուլը հաճախ է գրում, թե ՀՀ արդարադատության նախարարության գեներալ մայոր, ՀՀ գլխավոր հարկադիր կատարող, պետական բազմաթիվ պարգևների արժանացած Միհրան Պողոսյանը ինչ ահռելի ունեցվածք ունի և զավեշտալի է, որ անգամ երեխաներին չեն խնայում: Այս առումով ֆեյսբուքյան օգտատերերից մեկը հետևյալ գրառումն էր արել. «Եթե հաշվի առնենք, որ բռնագանձած յուրաքանչյուր գարշոկի արժեքը համարժեք է առավելագույնը 3 բանանի գնին, ուրեմն կարելի է ասել, որ Միհրան Պողոսյանն այս քայլով, իր նշաձողը հանուն 3 բանանի՝ բանանի մակարդակից իջեցրեց գարշոկի մակարդակի»: