Որդեկորույս ծնողը ցավից է խոսում, ոչ թե իրենց նման վաճառված է․ իշխանական ֆեյքերը սպառնալիքներով հարձակվել են զոհվածի մոր վրա (լուսանկարներ)

Օրերս Աննա Հակոբյանը, կեսգիշերին այցելել է Եռաբլուր՝ օգնականներից մեկի որդու գերեզմանին, որտեղ միջադեպ է տեղի ունեցել։ «Տիկինը», հավանաբար, մտածել է, որ այդ կերպ զերծ կմնա իր համար անցանկալի աչքերից։ Սակայն այնտեղ եղել են զոհվածների ծնողներ, ովքեր դժկամությամբ են տարել Աննա Հակոբյանի ներկայությունը։ Իսկ ավելի կոնկրետ, վրդովված մայրերը մի քանի մեղադրող խոսք են նետել Աննա Հակոբյանին։ 

Ծնողներից մեկը նեղսրտած գոռացել է Աննայի հետևից, թե՝ «անգերեզման ես մնալու»։ Սա էլ դրանից նեղվում, հարձակվում է այդ ծնողի վրա և մատ թափ տալով ասում ՝ «դուք ձեր հալը հլը կտեսնեք»։

Ավելի ուշ, նրա այս արտահայտությանն արձագանքում է մեկ այլ զոհված հերոսի ծնող՝  Ժիրայր Մարգարյանի մայրը` Նաիրա Մարգարյանը։ Թեև հերոսածին կինը ներկա չէր եղել միջադեպին, սակայն այդ պատմությունը հուզել ու վրդովել է նրան։ Նաիրա Մարգարյանը ֆեյսբուքյան իր էջում անդրադառնալով Աննա Հակոբյանի սպառնալիքին, նշել էր՝ «մենք մեր հալը արդեն տեսել ենք, դուք ձեր արածի պատասխանատվությունը տալու եք ամենադաժան ձևով»։

Այս գրառումից հետո սկսվում է հարձակում որդեկորույս մոր ֆեյսբուքյան էջին։ Ֆեյսբուքյան օգտատերեր՝ իրենց դեմքով ու ֆեյք էջերով, լսված ու չլսված վիրավորանքներով, հարձակվում են կնոջ վրա։

Նաիրա Մարգարյանը, NEWSPRESS.am-ի հետ զրույցում պատմեց, որ մեկ այլ առիթով էլ, երբ ծնողներն ակնկալիքով հանդիպել էին Նիկոլ Փաշինյանի հետ, նա էր մատ թափ տվել, թե՝ դուք ձեր հալը կտեսնեք։ 

Այս խոսքը ծանոթ էր կնոջը ու նա իր գրառումն էր արել, որին էլ հետևել էին նամակներ՝ ձայնային ու գրավոր, և մեկնաբանություններ։

«Ասում են՝ ո՞վ ես դու այ․․․, ի՞նչ իրավունք ունես խոսելու, ասում են՝ ռոբական-սերժական, ասում են փող են տալիս դրա համար ես խոսում։ Որդեկորույս ծնողը ցավից է խոսում, ոչ թե ինչ-որ բանի դիմաց։ Իրենք երևի փողով են մեկնաբանություններ ու նամակներ ուղարկում, գիտեն՝ մե՞նք էլ ենք իրենց նման վաճառված։ Ես ցավից եմ խոսում․ իրենց ոչ դիվանագիտական քայլերի ու բացթողումների պատճառով այս օրին հասանք, ես ոչ թե իրենց երեխեքին, այլ հենց իրենց կցանկանամ այս ամենը։ Ես իրենց երեխեքին բան չեմ ասել»,- ասաց Նաիրա Մարգարյանը։

Իրեն ուղղված վիրավորական ձայնային նամակներից մեկին տիկին Մարգարյանը պարզապես արձագանքել է․ «Ուղղակի մի բան կասեմ՝ դասդ լավ չէիր սովորել, դեպքերը ու դեմքերը խառնել էիր իրար։  Էսօրվա համար՝ երկուս։ Փող ես վերցնում՝ աշխատի, դասդ լավ սովորես»։

Արմինե Մկրտումյան